პარლამენტის დეპუტატი და ჯანდაცვის კომიტეტის თავმჯდომარე აკაკი ზოიძე On.ge-სთან საუბარში აფასებს იმ ფაქტს, რომ შინაგან საქმეთა სამინისტრო შეუერთდა აქციას #არაჩადებას. დეპუტატის თქმით, ეს მეტყველებს პოზიციაზე, რომ შსს იქნება შეურიგებელი ასეთი ფაქტების მიმართ:

"საზოგადოებაში თუ არის გაჩენილი ეჭვი, რომ ჩადებები არის იმაზე უფრო ხშირად ვიდრე ეს რეალურად ხდება, რამდენიმე ფაქტი არაპირდაპირად სასამართლომაც აღიარა რეპერების შემთხვევაში, რომ დარღვევას ჰქონდა ადგილი პოლიციის მხრიდან, - ამაზე რეალურად სამართალდამცავი უწყება იქნება შეურიგებელი. ჩემი აზრით, კარგი პოზიციაა არა იმის თქმა, რომ აი, არაფერი არ ხდება, არამედ თუ ხდება მე ვიქნები უმკაცრესად განწყობილი. ერთი მხრივ ისინი დაიცავენ პოლიციელის ღირსებას, მაგრამ ორმაგად უფრო მკაცრი იქნებიან ისინი, თუკი პოლიციელი უფლბამოსილებას გადაამეტებს".

დღეს, 4 თებერვალს, შინაგან საქმეთა სამინისტროს ფეისბუკის ოფიციალურ გვერდზე წარწერა "არა ჩადებას!" გაჩნდა. უწყების პრესსამსახურში On.ge-ს უთხრეს, რომ ამით აქციას "არა ჩადებას!" შეუერთდნენ.