3 აპრილიდან საქართველოს დიპლომატიური, ოფიციალური ან სამსახურებრივი პასპორტის მფლობელებს შვეიცარიაში შესასვლელად ვიზა დასჭირდებათ. აღნიშნული გადაწყვეტილება ფედერალურმა საბჭომ 1-ელ აპრილის სხდომაზე მიიღო. ეს ღონისძიება შენგენის კანონმდებლობის (Schengen acquis) შემდგომ განვითარებას წარმოადგენს და ძალაში 12 თვის განმავლობაში დარჩება. საქართველოს სხვა მოქალაქეებს ეს გადაწყვეტილება არ ეხებათ. ამის შესახებ ინფორმაციას შვედეთის საგარეო საქმეთა ფედერალური დეპარტამენტი ავრცელებს.

მათი განმარტებით, ევროკავშირის გადაწყვეტილება, საქართველოს დიპლომატიური პასპორტების მფლობელებისთვის უვიზო რეჟიმის გაუქმებასთან დაკავშირებით შენგენის კანონმდებლობის შემდგომ განვითარებას წარმოადგენს, რომლის მიღება შვეიცარიას ევალება. უწყების განცხადებაში ასევე წერია, რომ ჩერდება შვეიცარიასა და საქართველოს შორის ვიზების გაცემის გამარტივების შესახებ შეთანხმების რამდენიმე მუხლი

"ევროკავშირმა ახლახან გააძლიერა მესამე ქვეყნებისთვის ვიზების შეჩერების მექანიზმი, რაც მას საშუალებას აძლევს, დროებით დააწესოს სავიზო მოთხოვნები ახალი საფუძვლებით. მათ შორისაა მესამე ქვეყანასთან საგარეო ურთიერთობების გაუარესება ადამიანის უფლებებისა და ფუნდამენტური თავისუფლებების დარღვევის გამო.

ევროკავშირმა გადაწყვიტა აამოქმედოს ეს ახალი დებულებები საქართველოს მიმართ. გასულ წელს საქართველოს მიერ მიღებულ საკანონმდებლო ცვლილებებზე მითითებით, ევროკავშირმა 12 თვის ვადით შეუჩერა უვიზო მიმოსვლა ქართველ დიპლომატებსა და საჯარო მოხელეებს.

ევროკავშირის გადაწყვეტილება შენგენის კანონმდებლობის შემდგომ განვითარებას წარმოადგენს, რომლის მიღებაც შვეიცარიას ევალება. ეს ნაბიჯი გულისხმობს ცვლილებების შეტანას "შესვლისა და ვიზების გაცემის შესახებ" დადგენილებაში. გარდა ამისა, ჩერდება შვეიცარიასა და საქართველოს შორის ვიზების გაცემის გამარტივების შესახებ შეთანხმების რამდენიმე მუხლი", — წერია უწყების მიერ გავრცელებულ განცხადებაში.