სტრასბურგში, ევროპის საბჭოს ადგილობრივ და რეგიონულ ხელისუფლებათა კონგრესის ფარგლებში, პოლიტიკური ჯგუფი "პატრიოტები ევროპისთვის კონგრესში" (Patriots for Europe in Congress) დაფუძნდა, რომელსაც ქართული ოცნებაც შეუერთდა.

პოლიტიკურ ჯგუფს ქართული ოცნებიდან 8 წარმომადგენელი ჰყავს და მისი თავმჯდომარის მოადგილე თბილისის საკრებულოს იურიდიულ საკითხთა და ადამიანის უფლებათა დაცვის კომისიის თავმჯდომარე, ნინო ვარდოსანიძეა. ქართული ოცნების გარდა, პოლიტიკურ ჯგუფს შეუერთდნენ იტალიური, ჩეხური, ავსტრიული და ესპანური პარტიების წარმომადგენლებიც. ჯგუფს ვიქტორ ორბანის პარტიის წევრი, ანა მაგიარი უხელმძღვანელებს.

"ჯგუფში, Fidesz-KDNP-ის (უნგრეთი) 7 მერსა და ადგილობრივ წარმომადგენელთან ერთად, კონსერვატიული ღირებულებების ერთობლივი დაცვისთვის, ერთმანეთის სოლიდარობისა და დახმარების პირობით, გაერთიანდნენ ადგილობრივი და რეგიონული პოლიტიკოსები შემდეგი პარტიებიდან:

იტალიური Lega (5 წარმომადგენელი);

ჩეხური ANO 2011 (6 წარმომადგენელი);

ქართული ქართული ოცნება (8 წარმომადგენელი);

ავსტრიული FPÖ (2 წარმომადგენელი);

ესპანური VOX (1 წარმომადგენელი);

პოლიტიკურ ჯგუფის თავმჯდომარედ ანა მაგიარი აირჩიეს (Fidesz-KDNP), მისი ვიცეთავმჯდომარეები რიჩარდ ვერესი (ANO 2011) და ნინო ვარდოსანიძე (ქართული ოცნება) არიან, ხოლო ხაზინადარია ანდრეას რაბლი (FPÖ). პრეზიდიუმში წარმოდგენილია ყველა ეროვნული წევრი პარტია. ახალი პატრიოტული პოლიტიკური ჯგუფი, ფაქტობრივად, ევროპარლამენტის "პატრიოტები ევროპისთვის" "უმცროსი ძმაა" და იმავე გზას ადგას სტაბილური ღირებულებების წარმოსაჩენად დღევანდელ ტურბულენტურ, გაურკვეველ და სახიფათო სამყაროში", — წერია გავრცელებულ ინფორმაციაში.

თბილისის საკრებულოს ცნობით, ჯგუფის მიზანი სუვერენიტეტის მომხრე, პატრიოტი ევროპელი პოლიტიკოსების თანამშრომლობის გაძლიერებაა. მათივე განმარტებით, ჯგუფი ეროვნული უსაფრთხოების დაცვის საკითხებზე იმუშავებს.

"ჯგუფის მიზანი სუვერენიტეტის მომხრე, პატრიოტი ევროპელი პოლიტიკოსების თანამშრომლობის გაძლიერებაა. ჯგუფი ეროვნული უსაფრთხოების დაცვის საკითხებზე იმუშავებს და სხვადასხვა მნიშვნელოვან საკითხზე კონგრესში აღნიშნულ პოლიტიკურ ჯგუფში შემავალი ფრაქციების წარმომადგენლების მოსაზრებების გაჟღერებას უზრუნველყოფს", — აღნიშნულია თბილისის საკრებულოს მიერ გავრცელებულ პრესრელიზში.

მანამდე, ჟურნალისტმა თამარ ნუცუბიძემ სოციალურ ქსელში დაწერა, რომ აღნიშნული პარტია "ნაციონალურ კონსერვატორული, მემარჯვენე პოპულისტური და ევროსკეპტიკოსია". მისივე თქმით პარტია მხარს უჭერს ევროკავშირის დაშლას.

"მოკლედ, გაირკვა რომ, ქართული ოცნების წარმომადგენლები ადგილობრივი და რეგიონული თვითმმართველობის კონგრესში ჩამოყალიბებულ პოლიტიკურ ოჯახს "პატრიოტები ევროპისთვის" შეუერთდნენ. ისე, რომ იცოდეთ რა პარტია ეს — ნაციონალურ კონსერვატორული, მემარჯვენე პოპულისტური და ევროსკეპტიკოსები. აი, ის პარტიაა, ვიქტორ ორბანმა და მარი ლე პენმა მეგობრებთან ერთად რომ ჩამოაყალიბეს. ის პარტიაა, რომელიც არათუ მხარს არ უჭერს საქართველოს ევროკავშირში გაწევრიანებას, თავად ევროკავშირის დაშლის მსურველები არიან. ის პარტიაა, რომელსაც ევროპარლამენტში ცივილური დიდი პარტიებიდან არავინ ეთანამშრომლება. ასევე გაირკვა, რომ არა ქართული ოცნება და მათი რვა წევრი, ეს პოლიტიკური ჯგუფი ვერ შეიკვრებოდა, რადგან საჭირო იყო 28 ადამიანი. ანუ ხვდებით ხომ, ქართულმა ოცნებამ ხელი შეუწყო იმ პოლიტიკური ჯგუფის ჩამოყალიბებას კონგრესში, რომელიც წინააღმდეგია ევროკავშირის გაფართოების! ("პატრიოტები ევროპისთვის" მარგინალურ იდეებზე და ქმედებებზე რომ არაფერი ვთქვა)", — წერს ჟურნალისტი თამარ ნუცუბიძე, რომელსაც 2025 წლიდან საკუთარი მედიაპლატფორმა "ევროსკოპი" აქვს და ბრიუსელიდან საერთაშორისო საკითხებს აშუქებს.