დღეს, 1-ელ აპრილს, პარლამენტის სხდომაზე პარტია გახარია საქართველოსათვის ერთ-ერთი ლიდერი გიორგი შარაშიძე და ქართული ოცნების დეპუტატი ირაკლი ზარქუა ერთმანეთს ქვეყანაში მინიმალური ხელფასის განსაზღვრის საკითხთან დაკავშირებით დაუპირისპირდნენ.

პარლამენტს გამოსვლისას ირაკლი ზარქუამ რამდენჯერმე შეაწყვეტინა სიტყვა გიორგი შარაშიძეს.

გიორგი შარაშიძე: "რისთვის გვჭირდება ასეთი ეკონომიკური ზრდა? იმისთვის, რომ ისევ ერთი და იგივე ოჯახები გამდიდრდნენ და გაზარდონ ბიზნესები. მე მინდა შეგახსენოთ, თქვენივე პარტიის გენერალური მდივნის, თბილისის მერის, კახა კალაძის ფრაზა, სრულ რამდენიმე თვის წინ, შეგიძლიათ გადაამოწმოთ, სიტყვა-სიტყვით ვციტირებ — "რა გიკვირთ, როდესაც მსხვილი ბიზნესის უმრავლესობა 99% არის ქართული ოცნების შემომწირველი". გასაკვირი ის არის, რომ გვიჩნდება საფუძვლიანი ეჭვი, როდესაც ასე თავგამოდებით იცავთ ბიზნესებს და მათ მილიონიან მოგებებს და არ გინდათ რომ ადამიანებს ელემენტარული, ღირსეული ანაზღაურება ჰქონდეთ, მათ მოგებებს იცავთ, იმიტომ, რომ ისინი მერე თქვენ გაფინანსებენ."

ირაკლი ზარქუა: "რეჟიმი იყო აქ (წინა ხელისუფლება) რა დღეში იყო ბიზნესი?... ეგ დემაგოგია არ გინდა..."

გიორგი შარაშიძე: "მასე შენს ყოფილებს ესაუბრე..." ("ტვ პირველი").

შეგახსენებთ, რომ პარლამენტმა ფრაქცია საქართველოსთვის საკანონმდებლო ინიციატივა, რომელიც როგორც საჯარო, ისე კერძო სექტორში მინიმალური სახელფასო ზღვრის 1 050 ლარამდე გაზრდას ითვალისწინებდა, "ჩააგდო".