თეთრი სახლის მიერ მოკლე დროით გამოქვეყნებულ და შემდეგ წაშლილ ვიდეოში, დონალდ ტრამპმა განაცხადა, რომ ემანუელ მაკრონს მისი მეუღლე "უკიდურესად ცუდად“ ეპყრობა. ამის შესახებ The Independent წერს.

"დავურეკე საფრანგეთს, მაკრონს, რომელსაც ცოლი უკიდურესად ცუდად ეპყრობა და ის ჯერ კიდევ გონს მოდის ყბაში მიყენებული დარტყმის შემდეგ", — თქვა ტრამპმა.

ტრამპმა გაიხსენა საფრანგეთის ლიდერთან გამართული საუბარი სამხედრო მხარდაჭერის შესახებ და აღნიშნა, რომ მან მაკრონს სთხოვა დახმარების გაგზავნა [სპარსეთის] ყურეში, თუმცა პასუხად მიიღო, რომ საფრანგეთი დახმარებას მხოლოდ კონფლიქტის დასრულების შემდეგ შეძლებს. მან გააკრიტიკა ეს პასუხი და განაცხადა, რომ საჭირო იყო დაუყოვნებლივი მხარდაჭერა და არა დაგვიანებული ქმედება.

ტრამპს საფრანგეთის პრეზიდენტი მოკლე კომენტარით გამოეხმაურა. საფრანგეთის ლიდერმა აღნიშნა, რომ ტრამპის კომენტარები, რომლებშიც აშშ-ის პრეზიდენტი მასზე და მის მეუღლე, ბრიჯიტზე საუბრობს "არც ელეგანტურია და არც შესაბამისი".

რაც შეეხება სპარსეთის ყურეში მიმდინარე მოვლენებს, საფრანგეთის პრეზიდენტმა განაცხადა, რომ ჰორმუზის სრუტის ძალით გახსნის მიზნით სამხედრო ოპერაციის დაწყება არარეალისტურია.

"ზოგიერთი ადამიანი ემხრობა ჰორმუზის სრუტის სამხედრო ოპერაციის გზით, ძალით გათავისუფლების იდეას — პოზიციას, რომელიც ზოგჯერ გამოთქმულია შეერთებული შტატების მიერ, თუმცა ის ცვალებადია. ეს არასოდეს ყოფილა ის ვარიანტი, რომელსაც ჩვენ მხარს ვუჭერდით, რადგან ის არარეალისტურია. ამას დასჭირდებოდა უსასრულო დრო და ყველას, ვინც სრუტეში გაივლის, საფრთხის წინაშე დააყენებდა არა მხოლოდ რევოლუციური გვარდიის, არამედ ბალისტიკური რაკეტების მხრიდანაც" — განუცხადა მაკრონმა ჟურნალისტებს სამხრეთ კორეაში ვიზიტის დროს.