არასამთავრობო ორგანიზაცია "საერთაშორისო გამჭვირვალობა — საქართველო" (TI) ცხოველების პოპულაციის მართვის შესახებ ინფორმაციას აქვეყნებს და აცხადებს, რომ არსებული პრაქტიკა და მთავრობის ახალი რეგულაციები როგორც საერთაშორისო სტანდარტებს, ისე ეროვნულ კანონმდებლობას ეწინააღმდეგება.

ორგანიზაციის შეფასებით, მთავრობის 2026 წლის №142 განკარგულება აწესებს იმაზე მკაცრ შეზღუდვებს, ვიდრე ამას 2025 წელს მიღებული კანონი "შინაურ ბინადარი ცხოველების შესახებ" ითვალისწინებს. კერძოდ: განკარგულება კრძალავს ძაღლების დაბრუნებას სკოლებთან, ბაღებთან, კვების ობიექტებთან, ბაზრებსა და სასტუმროებთან, თუმცა არ განსაზღვრავს რადიუსს ან შეფასების კრიტერიუმებს.

TI მიუთითებს, რომ ასეთი ბუნდოვანი ჩანაწერები არღვევს სამართლებრივი განსაზღვრულობის პრინციპს და ქმნის ცუდ პრეცედენტს, როდესაც ქვემდებარე აქტით კანონზე მკაცრი შეზღუდვები წესდება.

ორგანიზაცია ყურადღებას ამახვილებს ცხოველების ადგილიდან გაყვანისა და მათი უკან არდაბრუნების პრაქტიკაზე. TI წერს, რომ 2025 წელს სურსათის ეროვნულ სააგენტოს 9 000 ცხოველის სტერილიზაცია-დაბრუნება ევალებოდა, თუმცა უფლებადამცველთა თქმით, ბევრი მათგანი გაუჩინარდა. მათივე განმარტებით, ცხოველების გადაყვანა უცხო ან დაუსახლებელ გარემოში, სადაც საკვები და წყალი ხელმიუწვდომელია, იწვევს მათ ტანჯვას და დაღუპვას, რაც კანონით აკრძალული სასტიკი მოპყრობაა.

TI-ის მიერ გავრცელებულ ინფორმაციაში მოყვანილია ბათუმის მაგალითი, სადაც მერია მეექვსე წელია ვერ ახერხებს თავშესაფრის აშენებას.

"საერთაშორისო გამჭვირვალობა — საქართველოს" რეკომენდაციები ასეთია:

  • გაუქმდეს განკარგულების ის პუნქტი, რომელიც ზღუდავს ცხოველების ბუნებრივ გარემოში დაბრუნებას.

  • შეწყდეს ცხოველების სხვა ქალაქებში გადაყვანა და ვაქცინაცია-სტერილიზაცია განხორციელდეს ადგილობრივად.

  • გაიზარდოს გამჭვირვალობა: შესაბამისმა ორგანოებმა მიმკედლებლებს მიაწოდონ სრული ინფორმაცია ცხოველის ადგილსამყოფელისა და დაბრუნების ვადების შესახებ.

ორგანიზაცია ხაზს უსვამს, რომ პრობლემის სისტემური გადაწყვეტა მხოლოდ პატრონიანი ცხოველების გამრავლების კონტროლითა და ჰუმანური პრევენციული პოლიტიკითაა შესაძლებელი.

TI-ის სტატია სრულად იხილეთ აქ.

შეგახსენებთ, ცხოველთა უფლებადამცველები აცხადებენ, რომ სტერილიზაციისთვის წაყვანილი უპატრონო ცხოველები უჩინარდებიან. აღნიშნული ინფორმაცია სეს-მა უარყო. ასევე, გავრცელდა ინფორმაცია, რომ სტერილიზაციისთვის წაყვანილ მიუსაფარ ცხოველებს გორის კრემატორიუმში წვავდნენ, რაზეც მიუსაფარი შინაური ცხოველების მართვის შიდა ქართლის ინტერმუნიციპალურ სააგენტოში განაცხადეს, რომ აღნიშნული ინფორმაცია სიმართლეს არ შეესაბამება.