"სომხეთის მომავალ არჩევნებში კანდიდატურის დაყენება მხოლოდ იმ მოქალაქეებს შეუძლიათ, რომლებიც მხოლოდ სომხეთის პასპორტს ფლობენ", — ამის შესახებ სომხეთის პრემიერმინისტრმა ნიკოლ ფაშინიანმა 1-ელ აპრილს რუსეთის პრეზიდენტ ვლადიმერ პუტინთან შეხვედრისას განაცხადა და ხაზგასმით აღნიშნა, რომ ეს მოთხოვნა ქვეყნის კონსტიტუციიდან გამომდინარეობს. ინფორმაციას Armenpress ავრცელებს.

რუსეთის პრეზიდენტ ვლადიმერ პუტინთან შეხვედრისას ფაშინიანმა შიდა პოლიტიკურ მოვლენებზე ისაუბრა და აღნიშნა, რომ სომხეთი დემოკრატიული ქვეყანაა, სადაც პოლიტიკური აქტივობა ბუნებრივი პროცესია.

ფაშინიანის თქმით, რუსული პასპორტის მქონე პირები, სომხეთის რესპუბლიკის კონსტიტუციის თანახმად, ვერ იქნებიან კანდიდატები ვერც პარლამენტის წევრის და ვერც პრემიერმინისტრის პოსტზე.

"მინდა აღვნიშნო, რომ, მაგალითად, ჩვენ გვაქვს საპარლამენტო არჩევნები — პარლამენტის წევრების არჩევნები და ამ არჩევნების საფუძველზე გაიმართება პრემიერმინისტრის არჩევნები. და მინდოდა თქვენი ყურადღება მიმეპყრო იმ ფაქტზე, რომ ამ არჩევნებში მონაწილეობა მხოლოდ იმ მოქალაქეებს შეუძლიათ, რომლებსაც აქვთ სომხური პასპორტი. ანუ, სრული პატივისცემით, რუსული პასპორტის მქონე პირები, სომხეთის რესპუბლიკის კონსტიტუციის თანახმად, არ შეიძლება იყვნენ არც პარლამენტის და არც პრემიერმინისტრის კანდიდატები, — განაცხადა ფაშინიანმა.

მან ასევე აღნიშნა, რომ ეს შეზღუდვა სამართლებრივი ხასიათისაა და ვრცელდება ყველა ორმაგ მოქალაქეზე, მათი პოლიტიკური პოზიციის მიუხედავად.

მისივე განმარტებით, სომხეთში პოლიტიკური პროცესები უწყვეტად მიმდინარეობს და სოციალური ქსელები სრულიად თავისუფალია, რაც, მისი თქმით, ზოგჯერ კრიტიკის მიზეზიც ხდება.

მანამდე რუსეთის პრეზიდენტმა, ვლადიმერ პუტინმა განაცხადა, რომ სომხეთში ბევრი პრორუსული პოლიტიკური ძალა და ფიგურაა და აღნიშნა, რომ ზოგიერთი მათგანი ამჟამად პატიმრობაში იმყოფება. მან იმედი გამოთქვა, რომ ეს ძალები შეძლებენ ქვეყნის პოლიტიკურ პროცესებში მონაწილეობას, თუმცა იქვე ხაზგასმით აღნიშნა, რომ რუსეთი სომხეთის შიდა საქმეებში არ ერევა.

შეგახსენებთ, სომხეთის პრემიერმინისტრი, ნიკოლ ფაშინიანი, ოთხშაბათს, 1-ელ აპრილს, მოსკოვში, კრემლში რუსეთის პრეზიდენტ ვლადიმერ პუტინს შეხვდა.

არსებული ინფორმაციით, მხარეებმა რუსეთ-სომხეთის სტრატეგიული პარტნიორობისა და ალიანსის არსებული მდგომარეობა და პერსპექტივები, ინტეგრაციული თანამშრომლობა ევრაზიულ რეგიონში და რეგიონული დღის წესრიგის აქტუალური საკითხები, კერძოდ, სამხრეთ კავკასიაში ეკონომიკური და სატრანსპორტო-ლოგისტიკური კავშირების განვითარება განიხილეს.