საქართველოს მოქალაქეებისთვის დღეიდან, 2 აპრილიდან, ძალაში შედის სავიზო დეპოზიტის პროგრამა. ამის შესახებ ინფორმაციას საქართველოს აშშ-ს საელჩო ავრცელებს წერს, რომ საქართველოს მოქალაქეებს, რომლებიც აკმაყოფილებენ B1/B2 ვიზის მოთხოვნებს, დაეკისრებათ 15 000-მდე აშშ დოლარის ოდენობის დეპოზიტის გადახდა.

ახალი სავიზო რეგულაციის შესახებ ინფორმაცია საქართველოში აშშ-ის საელჩომ 19 მარტს გამოაქვეყნა. მათი ცნობით, სავიზო გასაუბრების შემდეგ, საქართველოს მოქალაქეებმა სავიზო დეპოზიტი 30 დღის განმავლობაში უნდა გადაიხადონ, რის შემდეგაც მიიღებენ აშშ-ში ერთჯერადად შესვლის ვიზას 3 თვემდე ვადით.

მიმდინარე წლის 18 მარტს, აშშ-ის სახელმწიფო დეპარტამენტმა საქართველო იმ ქვეყნების სიას დაამატა, რომლის მოქალაქეებსაც გარკვეული ტიპის, მათ შორის სამოგზაურო, ვიზებისთვის $15 000-მდე სავიზო დეპოზიტის გადახდა მოუწევთ. ინფორმაციას აშშ-ის სახელმწიფო დეპარტამენტი ავრცელებს. სახელმწიფო დეპარტამენტმა საქართველოს და კიდევ 11 ქვეყანას დააკისრა აღნიშნული სავიზო დეპოზიტის გადახდა. ეს ქვეყნებია: კამბოჯა, ეთიოპია, გრენადა, ლესოთო, მავრიკი, მონღოლეთი, მოზამბიკი, ნიკარაგუა, პაპუა-ახალი გვინეა, სეიშელები, ტუნისი.

ბოლო ცვლილებით, მაღალი რისკის ქვეყანათა რაოდენობა, რომლებზეც სავიზო დეპოზიტის პროგრამა ვრცელდება, 50-მდე გაიზარდა და მათ შორის საქართველო ერთადერთი ევროპული ქვეყანაა.