2017 წელს, 2016 წლის მაჩვენებელთან შედარებით, რეგისტრირებული დანაშაული 5,4 პროცენტით გაიზარდა და სულ 37 944 ფაქტი დაფიქსირდა. აღნიშნული სტატისტიკა შინაგან საქმეთა სამინისტრომ ორი წლის განმავლობაში პირველად გამოაქვეყნა.

შსს-ს ცნობით, სიცოცხლის წინააღმდეგ მიმართული დანაშაულებიდან განზრახ მკვლელობა არაა მომატებული. უწყების ინფორმაციით, ძირითადი წილი მოდის სსკ-ის 115-ე მუხლზე (თვითმკვლელობამდე მიყვანა), თუმცა ფაქტების უმრავლესობა არ თვითმკვლელობამდე მიყვანის კლასიკურ შემთხვევა არაა.

სტატისტიკის თანახმად, გაზრდილია ოჯახში ძალადობაზე რეგისტრირებული დანაშაულის მაჩვენებელი.

"ამ მუხლით რეგისტრირებული დანაშაულის ზრდა გამოწვეულია, ერთი მხრივ, მასობრივი კამპანიით ოჯახური ძალადობის წინააღმდეგ, რამაც გაზარდა სამართალდამცავი ორგანოებისთვის მიმართვიანობის მაჩვენებელი. მეორე მხრივ, იმ ფაქტით, რომ ადრე არსებული პრაქტიკისგან განსხვავებით, ძალადობის ფაქტებზე გამოცემული შემაკავებელი ორდერების პარალელურად, უმეტეს შემთხვევაში, იწყება გამოძიება", - აცხადებს შსს.

ადამიანის უფლებებისა და თავისუფლებების წინააღმდეგ მიმართული დანაშაულის თავიდან რეგისტრირებული დანაშაულის ნაწილი მოდის სსკ-ს 151-ე მუხლზე (მუქარა). ამ მუხლით გათვალისწინებული დანაშაული 61,7 პროცენტითაა გაზრდილი:

"მუქარის ფაქტების მნიშვნელოვანი ნაწილი მოდის ოჯახური კონფლიქტის საფუძველზე განხორციელებულ მუქარაზე. გაზრდილია როგორც დაზარალებულთა, ასევე, დანაშაულის შესახებ ინფორმაციის მქონე პირთა (ახლობლები, ნათესავები, მეზობლები) მხრიდან სამართალდამცავი ორგანოებისთვის მიმართვიანობის მაჩვენებელი."

საკუთრების წინააღმდეგ მიმართული დანაშაულის თავიდან, შსს-ს ცნობით, მომატებულია უმეტესად სსკ-ს 177-ე (ქურდობა), 180-ე (თაღლითობა) და 181-ე (გამოძალვა) მუხლებით გათვალისწინებული დანაშაული.

უწყების განცხადებით, ნარკოტიკული დანაშაულის თავში შემავალ თითქმის ყველა მუხლზე მაჩვენებელი შემცირებულია.

სტატისტიკის მიხედვით, მომატებულია ხე-ბუჩქნარის უკანონოდ გაჩეხვისა, წიაღით უკანონოდ სარგებლებისა და უკანონო თევზჭერის მაჩვენებელი.

ასევე, შსს-ს ინფორმაციით, მატება ფიქსირდება განაჩენის ან სხვა სასამართლო გადაწყვეტილების შეუსრულებლობასა, ან/და მისი შესრულებისთვის ხელის შეშლაზე.