ნიუ-იორკში, მეტროპოლიტენის ოპერის თეატრში გამოსვლის შემდეგ, ნიუ-იორკ ტაიმსმა ქართველ ოპერის მომღერალს, ანიტა რაჭველიშვილს ვრცელი სტატია მიუძღვნა:

რაჭველიშვილმა ვერდის ოპერა ტრუბადურში აზუჩენას როლი შეასრულა.

"საშინელი მოგონება მაწამებს და სისხლს მიყინავს" - ამბობს შურისძიებას მოწყურებული აზუჩენა.

"მაგრამ გულწრფელები ვიყოთ, ოპერის მოყვარულებო, რამდენჯერ დაურწმუნებიხართ რეალურად აზუჩენას, რომ ამ დროს სიმართლეს ამბობს? ზუსტად ვიცი, კიდევ უფრო ნაკლებ შემთხვევას გაიხსენებთ, როცა თქვენთვისაც სისხლი გაუყინავს. აი, სისხლი ნამდვილად იყინება ვენებში, როცა უყურებ და უსმენ ქართველ მეცო-სოპრანოს, ანიტა რაჭველიშვილს - იგი მთელ შოუს ისაკუთრებს აზუჩენას როლის შესრულებისას" - წერს ნიუ-იორკ ტაიმსი.

ანიტამდე, ბოშა ქალის, აზუჩენას როლს წლების განმავლობაში სხვა მომღერალი ასრულებდა. ჟურნალისტი წერს, რომ მისი პერსონაჟი უფერული იყო, ანიტა რაჭველიშვილმა კი მას "ემოციური გრადიაციები" და "ფერთა პალიტრა" დაუბრუნა.

"პერსონაჟის სისასტიკის, სიუხეშის გადმოცემასთან ერთად, რაჭველიშვილი ხშირად დელიკატური და მგრძნობიარეა ვერდის გულუხვად გრძელი ფრაზების მიმართ. მისი სიტყვები იკბინებიან. ხანდახან წარმოუდგენლად არაამქვეყნიურია. ხანდახან კი, ამქვეყნიური კი არა, მეტიც - ელემენტარული. გასაოცარია, რომ აზუჩენას დაუსრულებელი სასოწარკვეთის მიუხედავად, მაინც ელეგანტურია" - წერს გამოცემა.

ანიტა რაჭველიშვილის გამოსვლა მეტროპოლიტენის საოპერო თეატრის სცენაზე.

ტრუბადურის ახალი ვერსიის პრემიერა ნიუ-იორკის საოპერო თეატრში 22 იანვარს შედგა და 15 თებერვლამდე გაგრძელდება.