მეწარმე სუბიექტები, რომლებიც ეროვნულ ბანკში არ დარეგისტრირდებიან, 20-ზე მეტი ფიზიკური პირისგან ფულადი სახსრების მოზიდვას ვეღარ შეძლებენ. ინფორმაციას საქართველოს ეროვნული ბანკი ავრეცელებს.

საქართველოს ეროვნული ბანკის შესახებ კანონში შესული ცვლილებების მიხედვით, მეწარმე სუბიექტს ან ურთიერთდაკავშირებულ პირთა ჯგუფს ეკრძალება 20-ზე მეტი ფიზიკური პირისაგან დაბრუნებადი ფულადი სახსრების მოზიდვა, მათ შორის, სესხის აღება. ცვლილება ვრცელდება პირთა ფართო წრისაგან დაბრუნებადი ფულადი სახსრების მოზიდვის რეკლამირებაზეც თუ ასეთ საქმიანობას ახორციელებს ეროვნული ბანკის მიერ არარეგისტრირებული მიკროსაფინანსო ორგანიზაცია ან არასაბანკო-სადეპოზიტო-საკრედიტო საქმიანობის ლიცენზიის ან საბანკო საქმიანობის ლიცენზიის არმქონე სუბიექტი.

ცვლილება 2018 წლის 11 მარტიდან, ამოქმედდება. ყველა მეწარმე სუბიექტი, რომლებზეც ვრცელდება ორგანული კანონით გათვალისწინებული შეზღუდვა, ვალდებულია, მოქმედი კანონმდებლობის მოთხოვნების დაცვით, 11 მარტამდე, დარეგისტრირდეს ან მიიღოს ლიცენზია საქართველოს ეროვნულ ბანკში. წინააღმდეგ შემთხვევაში, მეწარმე სუბიექტს დაეკისრება საქართველოს კანონმდებლობით გათვალისწინებული პასუხისმგებლობა.