აშშ-ის მეცნიერებათა ეროვნული აკადემიის (PNAS) კვლევის თანახმად, იბუპროფენს ახალგაზრდა კაცის სათესლე ჯირკვლებზე ნეგატიური გავლენა აქვს. ინფორმაციას CNN ავრცელებს.

როცა საცდელმა პირებმა იბუპროფენის ის დოზა მიიღეს, რომელსაც ათლეტები იღებენ ხოლმე, მათ ერთ ნაწილს ჰორმონალური მდგომარეობა შეეცვალა. ასეთი ცვლილებები ან საერთოდ არ ხდება ხოლმე, ან მხოლოდ შუა ხნის ასაკში იწყება. ეს მდგომარეობა კი შემცირებულ ნაყოფიერებასთანაა დაკავშირებული.

აღნიშნული ნაშრომი იმ კვლევის გაგრძელებაა, რომელიც საფრანგეთში, ორსულ ქალებზე მიმდინარეობდა.

ფრანგი და დანიელი მკვლევარები აკვირდებოდნენ, როგორ ზეგავლენას ახდენდა ფეხმძიმე ქალზე სუსტი ტკივილგამაყუჩებლები: ასპირინი, აცეტამინოფენი (იგივე პარაცეტამოლი) და იბუპროფენი. მათი ექსპერიმენტები აჩვენებდა, რომ მამრობითი სქესის ბავშვების სათესლე ჯირკვლებზე სამივე ტიპის მედიკამენტი გავლენას ახდენდა.

კვლევის თანაავტორის, დევიდ კრისტენსენის განმარტებით, სამივე აღნიშნული მედიკამენტი ანტი-ანდროგენულია, რაც იმას ნიშნავს, რომ ისინი არღვევენ კაცის ჰორმონებს. მისივე თქმით, წამლებმა იმის ალბათობაც გაზარდეს, რომ ბავშვი, შესაძლოა, თანდაყოლილი ნაკლით დაბადებულიყო.

მკვლევრები იბუპროფენზე კონცენტრირდნენ, რადგან მას ყველაზე ძლიერი გავლენა ჰქონდა.

ტკივილგამაყუჩებლები Advil და Motrin იბუპროფენის ბრენდული დასახელებებია.

მეცნიერები თანხმდებიან, რომ კიდევ ბევრი კითხვაა პასუხგაუცემელი, რასაც დამატებითი კვლევა სჭირდება. მაგალითად, აქვს თუ არა გავლენა იბუპროფენის დაბალ დოზებს კაცის ჰორმონებზე და რამდენად შეუქცევადია დამდგარი ეფექტი.