ადამიანის უფლებების სწავლებისა და მონიტორინგის ცენტრი (EMC) საპოლიციო კონტროლის შესახებ 21 დეკემბერს მინისტრის მიერ გამოცემულ ბრძანებას გაასაჩივრებს საერთო სასამართლოებში.

EMC გამოხატავს მზადყოფნას სამართლებრივი დახმარება გაუწიოს მოქალაქეებს, რომლებიც თვლიან რომ მასშტაბური საპოლიციო ღონისძიებების დროს მათი უფლებები დაირღვა.

შინაგან საქმეთა მინისტრის 21 დეკემბრის ბრძანების საფუძველზე, 22-24 დეკემბერს (22 დეკემბრის 18:00 საათიდან 24 დეკემბრის 06:00 საათამდე), საქართველოს მთელ ტერიტორიაზე ხორციელდება სპეციალური საპოლიციო კონტროლი, იგივე რეიდი.

"აბსტრაქტული საფუძვლებით, დანაშაულის ზოგადი პრევენციის მიზნით, 36 საათის განმავლობაში მთელი ქვეყნის მასშტაბით საპოლიციო კონტროლის განხორციელება, რა დროსაც ქვეყნის ტერიტორიაზე მყოფი ნებისმიერი პირი შეიძლება დაექვემდებაროს პოლიციის მხრიდან შემოწმებას, წარმოადგენს არაპროპორციულ და არათანაზომიერ ჩარევას მოქალაქეთა უფლებებში", ნათქვამია EMC-ის განცხადებაში.

ორგანიზაცია აღნიშნავს იმასაც, რომ ფაქტობრივად პოლიცია ერთდროულად ატარებს საგამოძიებო და პრევენციულ ღონისძიებებს, თუმცა, არ აკონკრეტებს, რა საქმის გამოძიების ფარგლებში მიმდინარეობს ამ მასშტაბის ღონისძიებები.

EMC-ის განცხადებით, თუკი შინაგან საქმეთა სამინისტროს აქვს ინფორმაცია ქვეყნის ტერიტორიაზე მომხდარი დანაშაულის შესახებ, მან უნდა დაიწყოს გამოძიება და ჩაატაროს საგამოძიებო მოქმედებები შესაბამისი პროცედურების დაცვით. საპოლიციო კონტროლი კი არ არის საგამოძიებო მოქმედება.

EMC-ის რეკომენდაციით, სპეციალური საპოლიციო კონტროლის დროს, მოქალაქეებმა უნდა გაითვალისწინონ:

• ღონისძიების დაწყებამდე, პოლიციელი ვალდებულია მოქალაქეს წარუდგინოს თავი, აგრეთვე მისი სამუშაო ადგილი;
• რეიდის განხორციელებისას სავალდებულოა, პოლიციელი აღჭურვილი იყოს სამხრე ვიდეო-კამერით, რომელიც ჩართულ მდგომარეობაში უნდა იყოს მოქალაქესთან კონტაქტის დროს;
• რეიდის ფარგლებში, პირის ზედაპირული შემოწმება გულისხმობს მის ტანისამოსზე მხოლოდ გარედან შეხების გზით პირის შემოწმებას. ზედაპირული შემოწმების დროს პოლიციას არ აქვს უფლება, პირს ჯიბესი ჩაუყოს ხელი, გახადოს ტანსაცმელი, ან თავად მოქალაქეს სთხოვოს ამის გაკეთება;
• ზედაპირულ შემოწმებას ატარებს იგივე სქესის პოლიციელი;
• თუკი მოქალაქე მიიჩნევს, რომ ამ ღონისძიების ფარგლებში დაირღვა მისი უფლებები, ან სამართალდამცავმა დაარღვია ეთიკის წესები, მას შეუძლია მიმართოს სამინისტროს გენერალურ ინსპექციას, ნომერზე 126.

ტესტი: იცით, თუ არა, რისი უფლება გაქვთ პოლიციასთან კონტაქტის დროს?