International Energy Agency-ის კვლევის შედეგების თანახმად, საქართველო პირველია ჰაერის დაბინძურებით გამოწვეული სიკვდილიანობის მიხედვით 100 ათას მოსახლეზე. სიის მეორე და მესამე ადგილს ბულგარეთი და ჩინეთი იკავებენ, ბოლო სამეულში კი აშშ, არაბთა გაერთიანებული საემიროები და ბრუნეი შედიან.

ჰაერის დაბინძრებით გამოწვეული სიკვდილიანობის მაჩვენებელი ქვეყნებში. მონაცემები ასახავს დაღუპულთა რაოდენობას 100 ათას ადამიანზე

ფოტო: International Energy Agency

"ჰაერის დაბინძურების შედეგად გამოწვეული ლეტალური შედეგები დაკავშირებულია გოგირდის დიოქსიდთან, აზოტის ოქსიდთან, მყარ ნაწილაკებთან, ასევე მყარი საწვავის დაწვის შედეგად წარმოქმნილ ნარჩენებთან. წარმოდგენილი გრაფიკი არ მოიცავს კლიმატის ცვლილებისა და სათბურის გაზებით გამოწვეული სიკვდილიანობის მაჩვენებლებს".

ორგანიზაციის მიერ გამოქვეყებულ ანგარიშში დეტალურად არ არის ახსნილი, თუ რატომ მოხვდა საქართველო ამ სიის თავში, თუმცა აღნიშნულია, რომ უკანასკნელი ათწლეულის განმავლობაში საქართველოში გზებზე ძველი, დიზელის საწვავზე მომუშავე სატრანსპორტო საშუალებების რაოდენობის მკვეთრი ზრდა შეინიშნება, დაბინძურების მაჩვენებლის კვლევა კი პრაქტიკულად არ ხორციელდება:

"იმის გამო, რომ საქართველოში საზოგადოებრივი ტრანსპორტი საკმარისად განვითარებული არ არის, მოსახლეობის დიდი ნაწილი ავტომობილებით გადაადგილდება. შედეგად, აღნიშნული ავტომობილების რიცხვი მკვეთრად გაიზარდა უკანასკნელი ათწლეულის განმავლობაში, ბოლო 5 წლის პერიოდში კი თითქმის გაორმაგდა".

IEA-ს კვლევაში, რომელიც მსოფლიო ჯანდაცვის ორგანიზაციის მონაცემებსაც ეყრდნობა, აღნიშნულია, რომ საქართველოში მანქანების ვარგისიანობა არ მოწმდება, ამიტომ ქუჩებში უამრავი ტექნიკურად გაუმართავი ავტომობილი გადაადგილდება. ასევე წერია, რომ იაფფასიანი საწვავის გამოყენება და საცობების წარმოქმნა მკვეთრად უწყობს ჰაერის დაბინძურებას ხელს.

მიუხედავად იმისა, რომ საქართველო და ბულგარეთი აღნიშნულ სიაში პირველ და მეორე ადგილებს იკავებენ, ისეთ ქვეყნებში, როგორებიც ინდოეთი და ჩინეთია უფრო მეტია დაბინძურებული ჰაერით გამოწვეული სიკვდილიანობის მაჩვენებელი, რადგან ამ ორ უკანასკნელ ქვეყანაში მოსახლეობის რაოდენობაც გაცილებით დიდია.

IEA 1974 წელს დაარსებული საერთაშორისო ორგანიზაციაა, რომელშიც გაერთიანებულია 29 ქვეყანა და მისი მიზანია სანდო და ეკოლოგიურად სუფთა ენერგიის ხელმისაწვდომობის შექმნა. ორგანიზაციას მუშაობის 4 მიმართულება აქვს: ენერგეტიკული უსაფრთხოება, ეკონომიკური განვითარება, გარემოს შესახებ ინფორმატიულობის გაზრდა და ამ პროცესებში მსოფლიო ქვეყნების ჩართვა.