ჩინეთის საგარეო საქმეთა სამინისტრო უკრაინის პრეზიდენტის, ვოლოდიმირ ზელენსკის ბრალდებას ეხმაურება და რუსეთ-უკრაინის ომში მხარეებისთვის ლეტალური იარაღის მიწოდებას უარყოფს. მისი თქმით, უკრაინის საკითხთან დაკავშირებით პეკინის პოზიცია თანმიმდევრული და ნათელია.

"ჩინურ მხარეს არასდროს მიუწოდებია ლეტალური იარაღი კონფლიქტში მონაწილე მხარეებისთვის და მკაცრად აკონტროლებს ორმაგი დანიშნულების პროდუქტებს.

ჩვენ ყოველთვის აქტიურად ვცდილობდით საომარი მოქმედებების შეწყვეტას და სამშვიდობო მოლაპარაკებებს", — განაცხადა საგარეო საქმეთა სამინისტროს პრესსპიკერმა.

ცნობისთვის, უკრაინის პრეზიდენტმა, ვოლოდიმირ ზელენსკიმ გუშინ განაცხადა, რომ მისი ინფორმაციით, ჩინეთი რუსეთს იარაღს აწვდის. ზელენსკიმ დეტალები არ დააკონკრეტა, თუმცა განაცხადა, რომ კიევი მზადაა, ამ ინფორმაციასთან დაკავშირებით დეტალურად ისაუბროს.