"მსგავსი ფაქტი წარმოუდგენელი იქნებოდა ნებისმიერ ქვეყანაში, რომელსაც აქვს ოდნავ ნორმალური ქვეყნის პრეტენზიაც კი" - ასე გამოეხმაურა დემოკრატიული მოძრაობის თავჯდომარე, ნინო ბურჯანაძე გუშინ თავდაცვის მინისტრის მიერ ხელმოწერილ ბრძანებას, რომლის თანახმადაც აღნიშნულმა უწყებამ სავალდებულო სამხედრო სამსახური გააუქმა:

"საქმის კურსში არ არის არც პრეზიდენტი, არც მთავრობა, არც უშიშროების საბჭო, არც პრემიერმინისტრი".

უმრავლესობის წევრმა, მანანა კობახიძემ კი აღნიშნა, რომ საკითხი მთავრობის სხდომაზე დამატებით განხილვას საჭიროებს:

"ასევე ალბათ უშიშროების საბჭოს და თვითონ პრეზიდენტის პოზიციაც იქნებოდა მნიშვნელოვანი".

გუშინ თინა ხიდაშელმა მედიასთან გამართულ შეხვედრაზე ხელი იმ გადაწყვეტილებას მოაწერა, რომლის თანახმადაც, თავდაცვის სამინისტრო სავალდებულო სამხედრო სამსახურში მოქალაქეებს აღარ გაიწვევს.

თუმცა, როგორც On.ge-ს თავდაცვის სამინისტროში განუმარტეს, აღნიშნული ცვლილება სამხედრო მოსამსახურეთა მხოლოდ იმ 25%-ს შეეხება, რომლებსაც სწორედ ეს უწყება იწვევდა ჯარში, დანარჩენ 75%-ს კი, რომელსაც შსს და სასჯელაღსრულების დეპარტამენტი იწვევს, ცვლილებები არ შეეხება.