თავდაცვის და უშიშროების კომიტეტის თავჯდომარემ, ირაკლი სესიაშვილმა On.ge-სთან საუბარში თინა ხიდაშელის მიერ დღეს მიღებულ გადაწყვეტილებას სავალდებულო სამხედრო სამსახურის გაუქმებასთან დაკავშირებით, საკითხისადმი არასერიოზული მიდგომა და უპასუხისმგებლობა უწოდა. სესიაშვილის განმარტებით, ხიდაშელმა იცოდა, რომ ის ამ გადაწყვეტილების მიღების წინააღმდეგი იყო, თუმცა ეს არ გაითვალისწინა:

"ასეთი გადაწყვეტილებები, რომლებიც ძალიან მნიშვნელოვანია, ძალიან საკამათოა, რთულია და უკავშირდება ქვეყნის საერთო თავდაცვას და არა მხოლოდ თავდაცვის სამინისტროს ეხება, ეს საკითხი მაქსიმალურად უნდა იყოს განხილული მთავრობაზე, პარლამენტში, საზოგადოებაში. ასე ცალმხრივად გადაწყვეტილების მიღება მაშინ, როდესაც მინისტრმა შეიძლება პოსტი 2 კვირაში დატოვოს და იმის გაცხადება, რომ თუ არ მოეწონება მომავალ მინისტრს, შეცვალოს ეს გადაწყვეტილება, მინიმუმ არასერიოზულია მიდგომაა".

დღეს თავდაცვის მინისტრმა, თინა ხიდაშელმა ბრძანებას მოაწერა ხელი, რომლის თანახმადაც თავდაცვის სამინისტრო სამხედრო მოსამსახურეებს ჯარში აღარ გაიწვევს. ცვლილება სამხედრო მოსამსახურეთა მხოლოდ იმ 25%-ს შეეხება, რომელსაც აქამდე ზემოაღნიშნული უწყება იწვევდა ჯარში. რაც შეეხება დანარჩენ 75%-ს, რომელსაც შსს და სასჯელაღსრულების დეპარტამენტი იწვევს ჯარში, მათ აღნიშნული ცვლილება არ ეხებათ.