კორნელის უნივერსიტეტის მეცნიერებმა ახალი გამოთვლების შედეგი გამოაქვეყნეს, რომლის მიხედვითაც, უცხოპლანეტურ ცივილიზაციებთან კონტაქტი 1 500 წლის მერე დამყარდება.

ფერმის პარადოქსის და არაფრით გამორჩეულობის პრინციპის ანალიზის შედეგად, ასტრონომებმა დაადგინეს, რომ უცხო ცივილიზაციებთან ნებისმიერი სახის კონტაქტამდე დედამიწელებს 1 500 წელი აშორებთ.

ფერმის პარადოქსი სამყაროში უცხოპლანეტური ცივილიზაციების არსებობის შანსების სიმრავლისა და მათი აქამდე აღმოუჩენლობის შეუთავსებლობას გულისხმობს. ანუ, თუ მხოლოდ ჩვენს გალაქტიკაში ასობით მილიარდი ვარსკვლავია, აქედან ათობით მილიარდი - ჩვენი მზის მსგავსია, რომელთა გარშემოც ბრუნავენ პლანეტები და მათ შორის დედამიწის მსგავსები, ხოლო არაფრით გამორჩეულობის პრინციპის მიხედვით, თუ დედამიწა ტიპური შემთხვევაა, მაშინ არსებობს შესაძლებლობა, რომ რომელიმე პლანეტაზე, რომელიც დედამიწის ასაკის ან უფრო ძველია, აღმოცენებულიყო ცივილიზაცია, რომელიც გამოიგონებდა კოსმოსური გადაადგილების სხვადასხვა ხერხებს. ამასთან, მიუხედავად იმისა, რომ ჩვენი გალაქტიკა ძალიან დიდია და მასში სისტემიდან სისტემაში მოგზაურობას მილიონობით წლებიც შეიძლება დასჭირდეს, ჩვენამდე ვიღაცას უკვე უნდა მოეღწია.

მეცნიერების აზრით, ჩვენ არ უნდა ვიცადოთ 1 500 წელი და პირიქით, კვლავაც უნდა განვაგრძოთ სხვადასხვა სიგნალებისა და ნიშნების ძებნა, რათა რამე არ გამოგვეპაროს.

ჩვენის მხრივ კი, დედამიწიდან უკვე 80 წელიწადია კოსმოსში რადიო სიგნალები იგზავნება, რომლებმაც 80 სინათლის წლის რადიუსში მდებარე 8 531 ვარსკვლავამდე და მათ სისტემებში არსებულ 3 555 დედამიწის მსგავს პლანეტამდე მიაღწიეს. თუ რომელიმე მათგანზე ტექნოლოგიურად განვითარებული ცივილიზაცია ცხოვრობს, მათ ამ სიგნალების დეკოდირება და რამდენიმე ათასი დედამიწური ენის გაშიფრვა მოუწევთ.