ისრაელის გამანადგურებლებმა 15 ივნისის ღამეს საჰაერო იერიში მიიტანეს თეირანში მდებარე შაჰრანის ნავთობის საწყობსა და ირანის თავდაცვის სამინისტროს შენობაზე, ამის შესახებ Tasnim იტყობინება.

თავდასხმის სამიზნე თავდაცვის სამინისტროს შტაბ-ბინა იყო. როგორც სააგენტოს კორესპონდენტი იტყობინება, სამინისტროს ერთ-ერთმა საოფისე შენობამ მცირე დაზიანება მიიღო.

გარდა ამისა, ისრაელის თავდასხმის შედეგად, ხანძარი გაჩნდა შაჰრანის ნავთობსაცავში, რომელიც თეირანის მთავარი საწვავის საცავია, იუწყება The New York Times. თვითმხილველმა გამოცემას განუცხადა, რომ აფეთქება მიწისძვრას ჰგავდა.

Tasnim-ის ცნობით, ნავთობის საწყობზე თავდასხმის შედეგად, საწვავის ორ ავზს ცეცხლი გაუჩნდა. ირანის ნავთობის სამინისტროს ცნობით, მაშველებმა ხანძარი კონტროლს დაუქვემდებარეს და მოქალაქეებისთვის საფრთხე არ არსებობს.

ასევე გავრცელდა ინფორმაცია, რომ თეირანის ნავთობგადამამუშავებელ ქარხანაში ხანძარი გაჩნდა, თუმცა ირანის ხელისუფლებამ ეს ინფორმაცია უარყო.

ისრაელმა ირანზე დარტყმები 13 ივნისს დაიწყო. თავდაპირველად, ისრაელის სამხედრო ძალებმა ირანის ბირთვულ ობიექტებზე, საჰაერო თავდაცვის სისტემებსა და სამხედრო ობიექტებზე იერიში მიიტანეს. თუმცა, 14 ივნისს ისრაელმა ენერგეტიკულ ინდუსტრიაზე თავდასხმა დაიწყო და თეირანის მთავარ გაზის საცავ ობიექტს დაარტყა.

ისრაელის სამხედრო ძალების ცნობით, ისრაელმა ორ დღეში ირანზე დაახლოებით 150 დარტყმა განახორციელა, ხოლო ირანულმა ძალებმა ისრაელის მიმართულებით 200-ზე მეტი ბალისტიკური რაკეტა და ათობით დრონი გაუშვეს, წერს The New York Times.

ირანის განცხადებით, 13 ივნისს ისრაელის საჰაერო დარტყმების შედეგად 78 ადამიანი დაიღუპა, ხოლო 14 ივნისს - ათობით, მათ შორის სულ მცირე 60, როდესაც რაკეტა თეირანში 14-სართულიან საცხოვრებელ კორპუსს მოხვდა, იტყობინება „როიტერი“. ისრაელში ირანის მიერ განხორციელებული დარტყმების შედეგად სულ მცირე 11 ადამიანი დაიღუპა, მათი უმეტესობა 15 ივნისის ღამეს განხორციელებული დარტყმის დროს.