"მოტივაცია არის ძალიან მარტივი, რომ მოახდინონ ამ საკითხის აბსოლუტური პოლიტიზება და გაანეიტრალონ ოპოზიციური პოლიტიკური ფიგურა, ყოფილი პრემიერმინისტრი გიორგი გახარია და მისი ოპოზიციურად განწყობილი გუნდი", — პარტია საქართველოსთვის წევრი კახაბერ ქემოკლიძე პროკურატურის მიერ მათი პარტიის ლიდერის, გიორგი გახარიას წინააღმდეგ გამოძიების დაწყებას ეხმაურება.

მისი თქმით, როგორ შეიძლება ოცნების ხელისუფლებას არ სცოდნოდა საგუშაგოს გახსნის შესახებ, "როცა ამ ღონისძიებაში, გზის გაყვანის ღონისძიებაში იყო ჩართული რამდენიმე სახელმწიფო უწყება".

"მოტივაცია არის ძალიან მარტივი, რომ მოახდინონ ზოგადად ამ საკითხის აბსოლუტური პოლიტიზება და საბოლოო ჯამში, გაანეიტრალონ ოპოზიციური პოლიტიკური ფიგურა, ყოფილი პრემიერმინისტრი გიორგი გახარია და მისი ოპოზიციურად განწყობილი გუნდი, ცხადია. იმდენად აბსურდულია ეს მუხლი და მთლიანად ეს საქმე, რომ მაგათ ლოგიკას რომ გავყვეთ, აბსოლუტურად ყველა მინისტრი და მინისტრის მოადგილე, კურატორი მოადგილეები, რომლებიც კურირებდნენ საოკუპაციო თემატიკას, ორივე სამინისტროში, შსს-შიც და სუს-შიც, მაშინ იგივე ბრალი აქვთ წასაყენებელი, იმიტომ, რომ ბორდერიზაციის პროცესი 2013 წლის თებერვლიდან არის გააქტიურებული. როგორ შეიძლება, მათ ინფორმაცია არ ჰქონოდათ, როცა ამ ღონისძიებაში, გზის გაყვანის ღონისძიებაში იყო ჩართული რამდენიმე სახელმწიფო უწყება. მათ შორის ბატონმა გომელაურმაც თავად განაცხადა, რომ ვიცოდი, გზას რომ გაჰყავდათო და გვეგონა, რომ ომის ესკალაციის რისკი არსებობდაო. დეფაქტო ხელისუფლება აპირებდა, ე.წ. 1922 წლის რუკის მიხედვით ბორდერიზაციის აბსოლუტურად გაუგონარი ახალი ტალღის წამოწყებას და ეს პროცესი დაწყებული ჰქონდათ. მათ შორის, ჩორჩანაში მიმდინარეობდა ადამიანების დაკავება და ცენტრალურმა ხელისუფლებამ იმოქმედა ისე, მაშინდელმა შსს-მ, როგორც უნდა იმოქმედა ნორმალურ, საღად მოაზროვნე, რისკების დამზღვევ სახელმწიფო სტრუქტურას სახელმწიფო ინტერესებიდან გამომდინარე", — განაცხადა კახაბერ ქემოკლიძემ (კომენტარს ტვ პირველი ავრცელებს).

პროკურატურის ცნობით, დაწყებული გამოძიება "2019 წლის 24 აგვისტოს სოფელ ჩორჩანასთან საოკუპაციო ხაზის გასწვრივ შინაგან საქმეთა ყოფილი მინისტრის, გიორგი გახარიას მიერ განხორციელებული ქმედებას ეხება".

უწყების ცნობით, გამოძიება სისხლის სამართლის კოდექსით, "საბოტაჟის, უცხოეთის ორგანიზაციისათვის და უცხოეთის კონტროლს დაქვემდებარებული ორგანიზაციისათვის მტრულ საქმიანობაში დახმარების და საქართველოს კონსტიტუციური წყობილების და ეროვნული უშიშროების საფუძვლების წინააღმდეგ მიმართული საქმიანობისთვის ფინანსების მობილიზების ფაქტზე" მიმდინარეობს.

გუშინ ამ საქმეზე სანქცირებული ყოფილი შს მინისტრი ვახტანგ გომელაური დაიკითხა.

• "მარტო ჩემი ჩვენების საფუძველზე არა, მაგრამ ჩემი, როგორც ერთ-ერთი ჩვენების საფუძველზე, კი ბატონო" — გომელაური გახარიას დაკავებაზე