საქართველოს პრემიერ-მინისტრი, გიორგი კვირიკაშვილი ბათუმში მომხდარ ხანძარს ეხმაურება და აცხადებს, რომ დაისჯება ყველა, ვისაც ბრალი მიუძღვის ამ ტრაგედიაში. მისივე თქმით, მობილიზებულია ყველა შესაბამისი სამსახური, რათა ხანძრის გამომწვევი მიზეზები სწრაფად დადგინდეს:

"ამ უმძიმეს წუთებში ვუსამძიმრებ ბათუმში, ხანძრის შედეგად დაღუპულთა ოჯახებს და ახლობლებს. ეს ტრაგედია უმძიმესია თითოეული ჩვენგანისთვის."

კვირიკაშვილმა მაშველ-მეხანძრეებს მადლობა გადაუხადა.

ბათუმში, სასტუმრო ლეოგრანდში ხანძრის შედეგად, წინასწარი ინფორმაციით, 11 ადამიანი დაიღუპა, 19 კი დაშავდა. მაშველებმა და პოლიციელებმა სასტუმროს შენობიდან ასზე მეტი ადამიანის ევაკუაცია მოახდინეს. მათ შორის არიან როგორც სტუმრები, ასევე სასტუმროს თანამშრომლები. ისინი სხვადასხვა სირთულის ინტოქსიკაციის გამო, გადაყვანილი არიან ბათუმის კლინიკებში. გამოძიება სახანძრო უსაფრთხოების წესის დარღვევის მუხლით მიმდინარეობს.