ამერიკის შეერთებული შტატების ელჩი საქართველოში, იან კელი ამბობს, რომ მათი მთავრობა სახალხო დამცველის ინსტიტუტსა და ომბუდსმენ უჩა ნანუაშვილს სრულ მხარდაჭერას უცხადებს. ასე გამოეხმაურა აშშ-ს ელჩი ხელისუფლებისა და მმართველი პარტიის მიერ სახალხო დამცველის მიმართ გამოთქმულ კრიტიკას.

გთავაზობთ იან კელის კომენტარს, რომლის თარგმანსაც რუსთავი 2 ავრცელებს:

"ამერიკის შეერთებული შტატები, ჩვენი მთავრობა მხარს უჭერს სახალხო დამცველის ინსტიტუტს და ბატონ უჩა ნანუაშვილს, რადგანაც მიგვაჩნია, რომ ეს არის უმნიშვნელოვანესი ნაწილი დემოკრატიისა. მთავრობას, ხელისუფლებას აქვს გარკვეული უფლებები, თუმცა იმისათვის, რომ მოხდეს მათი ანგარიშვალდებულება და ასევე არსებობდეს პირდაპირი დიალოგი მოქალაქეებსა და მთავრობას შორის, მოქალაქეებისა და პრობლემების მთავრობამდე მიტანა, ამაში სახალხო დამცველი დიდ როლს თამაშობს. შესაბამისად, ვინც არ უნდა შეცვალოს ბატონი უჩა ნანუაშვილი, ჩვენ იმედი გვაქვს, რომ სახალხო დამცველი დამოუკიდებელი იქნება და გააგრძელებს ამ საქმიანობას".

საქართველოს იუსტიციის მინისტრმა, თეა წულუკიანმა უჩა ნანუაშვილის საქმიანობა ე.წ. ციანიდის საქმის ანგარიშის გამოქვეყნების შემდეგ შეაფასა. სახალხო დამცველის მონიტორინგის ანგარიშში ნათქვამია, რომ გამოძიების პროცესში დაშვებულმა დარღვევებმა სასამართლოს საბოლოო გადაწყვეტილებაზე გადამწყვეტი გავლენა იქონია. წულუკიანის აზრით, უჩა ნანუაშვილი პირველი უსამართლო ომბუდსმენია.