აშშ-ს სენატის თავდაცვის კომიტეტის გადაწყვეტილებით, რუსულ აგრესიასთან საბრძოლველად თავდაცვის ბიუჯეტში დამატებით $5 მილიარდი გამოიყოფა. წლევანდელი პროექტის თანახმად, თავდაცვის ბიუჯეტმა რეკორდული თანხა - $700 მილიარდი შეადგინა. აღნიშნული, ოდენობა 15 პროცენტით მეტია 2016 წლის სამხედრო ბიუჯეტზე.

ევროპაში ამერიკული სამხედრო ძალის განსათავსებლად და შესანახად $5 მილიარდი გამოიყოფა. როგორც დოკუმენტშია ნათქვამი, ეს ევროპელი პარტნიორების სიმშვიდისა და ნატოს პოზიციების გასამყარებლად კეთდება.

დოკუმენტი, ასევე, ითვალისწინებს ინდივიდუალურ დახმარებას ევროპის რეგიონის სხვადასხვა ქვეყნისთვის, მათ შორის, უკრაინისთვისაც. უკრაინის დასახმარებლად თავდაცვის ბიუჯეტში გამოყოფილია $350 მილიონი თუმცა, დოკუმნეტში აღნიშნულია, რომ თანხის ნახევარს უკრაინა მხოლოდ სამხედრო რეფორმების გატარების შემდეგ მიიღებს.

"შეკავების ევროპული ინიციატივის" შეთანხმების ფარგლებში, აშშ-ს თავდაცვის კომიტეტი ცალკეულად გამოყოფს 100 მილიონ დოლარს ბალტიის ქვეყნებისთვის. აღნიშნული თანხა ბალტიის ქვეყნებმა შესაძლო რუსული აგრესიის მაქსიმულურად ეფექტიანად შეკავებისთვის უნდა გამოიყენონ.

ნაციონალური თავდაცვის დოკუმენტში ასევე გათვალისწინებულია რუსული პროპაგანდის საფრთხეები. დოკუმენტის მიხედვით, საკაბელო ტელევიზიის ოპერატორებს აქვთ უფლება, უარი თქვან საკუთარ ქსელში იმ კონტენტის განთავსებაზე, რომელიც რუსეთის ხელისუფლების დახმარებით ან დაფინანსებით არის შექმნილი.

მოცემული დოკუმენტი, ასევე, უკრძალავს აშშ-ს თავდაცვის სამინისტროს კასპერკის ლაბორატორიის ნებისმიერი პროდუქციის გამოყენებას. არსებობს საფუძვლიანი ეჭვი, რომ კასპერკი აქტიურად თანამშრომლობს რუსულ სპეცსამსახურებთან.

"აუცილებელია, ყველა სამუშაო კომპიუტერიდან წაიშალოს კასპერსკის ნებიერმიერ პროგრამა და ამის შესახებ ანგარიში სენატს ჩაბარდეს", - ნათქვამია დოკუმენტში.

თავდაცვის ბიუჯეტის პროექტში რუსეთის საკითხს ცალკე თავი დაეთმო. დოკუმენტში ნათქვამია, რომ 2008 წელს საქართველოში და 2014 წელს უკრაინაში შეჭრის შემდეგაც, რუსეთი აგრძელებს თავის აგრესიულ ქმედებებს, რომელიც საფრთხეს უქმნის ნატოს და მის მოკავშირეებს. აღნიშნული დოკუმენტი საფრთხედ განიხილავს რუსეთის სამხედრო ძალის დაჩქარებულ ზრდას არქტიკისა და ხმელთაშუა ზღვის რეგიონებში. ასევე, ნახენებია ბირთვული პოტენციალის ფორსირებული ზრდაც.

აშშ-ს ინტერესებისთვის საფრთხის შემცველად დასახელდა რუსული პროპაგანდა და დეზინფორმაცია ასევე, კიბერ თავდასხმები და არჩევნებში ჩარევის მცდელობაც.

თავდაცვის ბიუჯეტის პროექტი ჯერ წარმომადგენელთა პალატამ და სენატმა უნდა დაამტკიცოს, ამის შემდეგ დოკუმენტის საბოლოო ხელმოსაწერად დონალდ ტრამპს გადაეგზავნება.