რუსეთის ფედერალური საბაჟო სამსახურის მონაცემებით, 18 აგვისტოს საქართველო-რუსეთის საზღვარზე, ზემო ლარსის საკონტროლო-გამშვებ პუნქტზე, ერთ დღეში 20 ათასზე მეტმა მგზავრმა გადაკვეთა საზღვარი, რაც რეკორდული მაჩვენებელია. ინფორმაციას რუსული მედია ავრცელებს.

ფედერალური საბაჟო სამსახურის ცნობით, ტურისტული ნაკადის ზრდას თან ახლავს მსუბუქი ავტომობილების რეკორდული რაოდენობაც. უწყების განცხადებით, საბაჟო და სასაზღვრო სამსახურებმა გამტარუნარიანობის გასაზრდელად დამატებითი თანამშრომლები ჩართეს, გააძლიერეს მორიგე ცვლები და ავტომობილების გაფორმების პროცესი დააჩქარეს.

მსგავსი მაღალი დატვირთვა უკვე რამდენიმე დღეა გრძელდება. 15 და 16 აგვისტოს ზემო ლარსი ყოველდღიურად 19 ათასზე მეტმა ადამიანმა გადაკვეთა, ხოლო წლევანდელი მაჩვენებლები წინა წლების ანალოგიურ პერიოდს მნიშვნელოვნად აღემატება.

მაღალი დატვირთვის გამო, რუსეთის საბაჟო სამსახური მოქალაქეებს ურჩევს, საქართველოში და საქართველოდან მგზავრობის დაგეგმვისას გზებზე არსებული ვითარება გაითვალისწინონ, დაიცვან საგზაო მოძრაობის წესები და მგზავრობის დროის გახანგრძლივებისთვის მზად იყვნენ, — წერს რუსული მედია.

შეგახსენებთ, რომ 13 აგვისტოს საქართველოს მხარეს მდებარე დარიალის სასაზღვრო-გამშვები პუნქტი განგაშის სიგნალის გამო ევაკუირებული იყო. ადრეული გაფრთხილების სისტემამ დევდორაკის ხეობაში მდინარის კალაპოტში ცვლილებები დააფიქსირა, რის შემდეგაც პუნქტზე მყოფი ყველა ადამიანი უსაფრთხო ადგილზე გადაიყვანეს.