გორში პაპუნა ლოცულაშვილის ცემისთვის ბრალდებულ 6-ვე პოლიციელს წინასწარი პატიმრობა შეეფარდა. გადაწყვეტილება გორის საქალაქო სასამართლოს მოსამართლემ, გერმანე დადეშქელიანმა მიიღო. პროკურატურა აღმკვეთი ღონისძიების სახით პატიმრობის გამოყენებას ითხოვდა.

"ეს ჩვეულებრივი საქმე არაა, ბრალდებულები პოლიციის თანამშრომლები არიან. გარდა დაკავებულისა იქ სხვა პირებიც ფიგურირებენ, ისინი ყველა ერთმანეთს იცნობს, ყველა ერთმანეთის კოლეგაა... მიმდინარეობს მათი დადგენის ღონისძიებები.

6 ბრალდებულიდან 4 საკუთარ ქმედებებზე უთითებს და იმასაც არასწორად, ბრალდების მიერ მოპოვებული მტკიცებულებების მიხედვით... არათუ ითანამშრომლეს, არამედ არ ითანამშრომლეს, რომ ეთანამშრომლათ, სხვა პირებიც გამოკვეთილი იქნებოდა, ნუ ნაწილი გამოკვეთილია, ნაწილი გამოიკვეთება, ადგილი ჰქონდა მათი მხრიდან გამოძიების შეცდომაში შეყვანას..." — განაცხადა საქმის პროკურორმა სასამართლო პროცესზე. (წყარო "რადიო თავისუფლება")

ბრალდებულებიდან არც ერთი მათგანი არ ესწრებოდა სასამართლო პროცესს. დაკავებულთა ასაკი — 19-დან 35 წლამდეა

  • ვლადიმერ გოდერძიშვილი დაბადებულია 2004 წელს;
  • ვანიკო მისირელი — 2002 წელს;
  • გიორგი (ზაკო) წკრიალაშვილი — 1991 წელს;
  • ალექსი ბადალოვი — 1990 წელს;
  • ბესო მალაციძე — 1992 წელს;
  • საბა წაველიძე — 2006 წელს.

პაპუნა ლოცულაშვილის ცემაში ბრალდებული პოლიციელის, საბა წაველიძის ადვოკატის, ზურა კაპანაძის მტკიცებით, მისი დაცვის ქვეშ მყოფი 19 წლისაა და "წინასწარი პატიმრობა უკიდურეს ღონისძიებას წარმოადგენს".

"მას არ აქვს ნასამართლობა, არ არის შემჩნეული სამართალდარღვევებში, ის ცხოვრობს ოჯახთან და აქვს სოციალური კავშირები, 19 წლის პირი წარმოადგენს რეაბილიტაციის მაღალი შესაძლებლობის ახალგაზრდას და არა პირს, რომლის იზოლაცია აუცილებელია... რა ფაქტი არსებობს, რომ ბრალდებული მიიმალება? გამოცხადდა საგამოძიებოში, მისცა გამოძიებას ჩვენება, ითანამშრომლა, მხოლოდ ბრალდების სიმძიმე ვერ გახდება მიმალვის რისკის ავტომატური საფუძველი...პროკურატურას არ წარმოუდგენია ფაქტები, რომ ბრალდებულს შეუძლია მოწმეებზე გავლენა მოახდინოს, დაუსაბუთებელია ახალი დანაშაულის ჩადენის საფრთხე, არ აქვს კრიმინალური წარსული... არ არსებობს ინფორმაცია, რომ იგი დაკავშირებულია დანაშაულებრივ ჯგუფებთან... წინასწარი პატიმრობა წარმოადგენს უკიდურეს ღონისძიებას," — განაცხადა ადვოკატმა (წყარო რადიო თავისუფლება)

27 მაისს, "ქართლის ამბებმა" გაავრცელა ვიდეო, სადაც ჩანს როგორ ძალადობს ფიზიკურად 10-მდე სამართალდამცავი ახალგაზრდა კაცზე. აღნიშნულ ფაქტზე პროკურატურამ პოლიციელთა მხრიდან სამსახურებრივი უფლებამოსილების სავარაუდო ძალადობით გადამეტების მუხლით გამოძიება უკვე დაიწყო. დაკავებულია 6 პოლიციელი.