ძლიერი საქართველო ლელოს ლიდერი ბადრი ჯაფარიძე სოციალურ ქსელში გამოქვეყნებულ წერილში საქართველოს 142-ე კათოლიკოს-პატრიარქს, შიო III-ს აღსაყდრების დღეს ულოცავს, მისი თქმით ეს დღე "მნიშვნელოვანია ეკლესიისთვის, ქვეყნისთვისა და ხალხისთვის".

"ვულოცავ საქართველოს კათოლიკოს-პატრიარქს, მცხეთა-თბილისის მთავარეპისკოპოსს, ბიჭვინთისა და ცხუმ-აფხაზეთის მიტროპოლიტს, დიდ მეუფეს, მამას ჩვენსას, შიო მესამეს აღსაყდრების დღეს. ძალიან მნიშვნელოვანი დღეა ჩვენი ეკლესიისთვის, ჩვენი ქვეყნისთვის, ჩვენი ხალხისთვის.

დღეიდან საქართველოს მართლმადიდებელ ეკლესიას ჰყავს ახალი პატრიარქი, რომლის წინამძღოლობით, დარწმუნებული ვარ, რომ ჩვენი ეკლესია გააგრძელებს იმ უმნიშვნელოვანესი და უნიკალური როლის შესრულებას, რომელიც მას ისტორიულად აკისრია — ჩვენი ერის რწმენაში გაძლიერება და ეკლესიის ირგვლივ საზოგადოების გამთლიანება.

ეკლესიის ძლიერება ყოველთვის იყო ჩვენი სახელმწიფოს ძლიერების განმაპირობებელი და ასე იქნება მომავალშიც" — ვკითხულობთ მილოცვაში.

ცნობისთვის, საქართველოს 142-ე კათოლიკოს-პატრიარქი სენაკისა და ჩხოროწყუს მიტროპოლიტი, საპატრიარქო ტახტის მოსაყდრე შიო მუჯირი გახდა. დღეიდან ის იწოდება, როგორც უწმინდესი და უნეტარესი, სრულიად საქართველოს კათოლიკოს-პატრიარქი, მცხეთა-თბილისის მთავარეპისკოპოსი და ბიჭვინთისა და ცხუმ-აფხაზეთის მიტროპოლიტი შიო III.

ტახტის მოსაყდრემ კენჭისყრაზე 39 ხმიდან 22 მიიღო. დანარჩენი ორი კანდიდატიდან, მროველ-ურბნელმა მიტროპოლიტმა იობ აქიაშვილმა მიიღო 9 ხმა, ფოთისა და ხობის მიტროპოლიტმა გრიგოლ ბერბიჭაშვილმა — 7 ხმა, 1 ხმა გაუქმდა.

შიო III სვეტიცხოვლის საკათედრო ტაძარში აკურთხეს. პატრიარქის აღსაყდრების რიტუალი 12 მაისს 10:00 საათიდან დაიწყო.