საპატრიარქოს საზოგადოებასთან ურთიერთობის სამსახურის ხელმძღვანელმა, დეკანოზმა ანდრია ჯაღმაიძემ განმარტა, თუ როგორ წარიმართება საქართველოს კათოლიკოს-პატრიარქის არჩევის პროცესი. მან ასევე მიანიშნა, რომ სინოდსმართვა-გამგეობის დებულების შეცვლის უფლება არ აქვს და, სავარაუდოდ, 70 წელს გადაცილებული მღვდელმთავრები პატრიარქობის კანდიდატები ვერ გახდებიან.

მისვე თქმით, წმინდა სინოდი დღევანდელ სხდომაზე სამ კანდიდატს დაასახელებს, ხოლო საბოლოო გადაწყვეტილებას მოგვიანებით, გაფართოებული კრება მიიღებს.

ჯაღმაიძემ ხაზგასმით აღნიშნა, რომ გაფართოებული კრების ჩატარების ბოლო ვადა 17 მაისია. გარდა ამისა, მან ყურადღება გაამახვილა კანდიდატების შერჩევის კრიტერიუმებზე, მათ შორის ასაკობრივ ზღვარსა და ეროვნულობაზე.

"ჯერ არ ვიცით თარიღი, როდის ჩაინიშნება გაფართოებული სხდომა, თუმცა 17 მაისამდე უნდა მოხდეს. არ არის აუცილებელი, დღეს მოხდეს თარიღზე მსჯელობა, მერეც შეიძლება. კრიტერიუმებში ჩვენ ვკითხულობთ, რომ უნდა იყოს ეროვნებით ქართველი, ბერი, ჰქონდეს საღვთისმეტყველო განათლება, ასაკით — არანაკლებ ორმოცი წლისა და არაუმეტეს სამოცდაათი წლისა. მე ვარ მათემატიკოსი და სიტყვა არაუმეტეს 70 ნიშნავს, რომ 70 ნებისმიერი დროის დამატებით უკვე აღარ არის 70-მდე, არაუმეტეს 70-ისა. ანუ 70 პლიუს რაღაც დღეები და თვეები უკვე უმეტეს 70 არის. როგორც მათემატიკოსისთვის, ჩემთვის ეს არის ცხადი. ვნახოთ, სინოდი რა გადაწყვეტილებას მიიღებს. მეორე არის, რომ ეკლესიის მართვა-გამგეობის დებულების შეცვლის უფლება არ აქვს ამ სინოდს და უნდა იხელმძღვანელოს მკაცრად მართვა-გამგეობის დებულებით.

ყველა საკითხი შეიძლება დადგეს ინტერპრეტაციის ქვეშ, მაგალითად, რას ნიშნავს ქართველი? მე მყავდა მეგობარი იეზიდი და შინაგანად იყო ძალიან კარგი ქართველი. ასე თუ ვიმსჯელებთ, მაშინ შეიძლება, ყველაფერი ეჭვქვეშ დავაყენოთ. არსებობს ასეთი მცნება, ფარული ბერები, რაც ნიშნავს, რომ აღკვეცილი არ არის, მაგრამ ბერულად ცხოვრობს. მაშინ ყველაფერი შეიძლება დადგეს ინტერპრეტაციის ქვეშ. ასე რომ, ვფიქრობ, ძალიან მნიშვნელოვანია ეკლესიის ცხოვრებისთვის, რომ წესი, რომელიც განსაზღვრულია, იყოს დაცული", — განაცხადა დეკანოზმა ანდრია ჯაღმაიძემ ("პირველი არხი").

აღნიშნულ ასაკობრივ კრიტერიუმს სინოდის 39-დან 30 წევრი აკმაყოფილებს.

ცნობისთვის, საქართველოს საპატრიარქოში დღეს, 28 აპრილს, სინოდის სხდომა მიმდინარეობს. მღვდელმთავრებმა იმ სამი კანდიდატი უნდა დაასახელონ, რომელთაგანაც ერთ-ერთი ახალი კათოლიკოს-პატრიარქი გახდება.

დღევანდელ სხდომაზე სინოდის წევრებმა ასევე უნდა იმსჯელონ შესაძლო პროცედურულ ცვლილებებზე, მათ შორის ასაკობრივ შეზღუდვებზე.

შეგახსენებთ, რომ ეკლესიის მართვა-გამგეობის დებულების თანახმად, პატრიარქის გარდაცვალების ან გადადგომის შემთხვევაში, ახალი წინამძღოლის არჩევა შეზღუდულ ვადებში, პატრიარქის გარდაცვალებიდან 40 დღის შემდეგ, არაუგვიანეს 2 თვეში უნდა განხორციელდეს.