"ჩემი პოზიცია ის იყო, რომ [პატრიარქობის კანდიდატის ასაკთან დაკავშირებული ზღვარი] შეიძლება კენჭისყრით მოიხსნას", — ამის შესახებ საპატრიარქოში სინოდის სხდომის დაწყებამდე დმანისისა და აგარაკ-ტაშირის ეპისკოპოსმა, მეუფე ზენონმა განაცხადა. მან აღნიშნა, რომ პროცესს საკუთარი ხედვითა და კანდიდატით უერთდება. ასაკობრივ შეზღუდვასთან დაკავშირებით კი მან განაცხადა, რომ ეს ზღვარი შეიძლება კენჭისყრით მოიხსნას.

"ყველაფერი დამოკიდებულია თვითონ იმ პროცესზე, რომელიც იქნება სინოდზე. რა თქმა უნდა, ჩემი მხრიდან კანდიდატი არსებობს. შედეგი იმის მიხედვით იქნება ნაჩვენები, როგორი პროცესიც იქნება და რა გადაწყვეტილებებსაც მიიღებენ მღვდელმთავრები.

რაც შეეხება ასაკობრივ ზღვარს, ჩემი პოზიცია ის იყო, რომ ეს ზღვარი შეიძლება კენჭისყრით მოიხსნას, იმიტომ, რომ ამის ხელშემშლელი კანონიკური საფუძველი არ არსებობს", — განაცხადა მეუფე ზენონმა (კომენტარს IPN ავრცელებს).

შეგახსენებთ, საქართველოს საპატრიარქოში დღეს, 28 აპრილს, სინოდის სხდომა მიმდინარეობს. მღვდელმთავრებმა იმ სამი კანდიდატი უნდა დაასახელონ, რომელთაგანაც ერთ-ერთი ახალი კათოლიკოს-პატრიარქი გახდება.

დღევანდელ სხდომაზე სინოდის წევრებმა ასევე უნდა იმსჯელონ შესაძლო პროცედურულ ცვლილებებზე, მათ შორის ასაკობრივ შეზღუდვებზე.