შალვა პაპუაშვილი თბილისში Trump Tower-ის მშენებლობის დაანონსებას გამოეხმაურა. მისი განმარტებით, საქართველო ლიდერია ეკონომიკური განვითარების ტემპებით მსოფლიოში და არა მხოლოდ რეგიონში. მისივე თქმით, ჩვენი ქვეყანა არის მშვიდობისა და სტაბილურობის კუნძული რეგიონში და საქართველოში კარგი საინვესტიციო გარემოა. შალვა პაპუაშვილმა ასევე აღნიშნა, რომ საქართველო ეკონომიკურად ყველასთვის მიმზიდველია. მან ასევე ხაზი გაუსვა იმასაც, აღნიშნული ინვესტიცია წაახალისებს არა მხოლოდ ინვესტიციებს, არამედ უძრავი ქონების ბაზარზე ახალ სტანდარტს შემოიტანს.

"ბოლო პერიოდში გამოქვეყნებული სხვადასხვა მონაცემით, საქართველო არის ლიდერი ეკონომიკური განვითარების ტემპებით მსოფლიოში და არა მხოლოდ რეგიონში. მეორე მხრივ, საქართველო არის მშვიდობისა და სტაბილურობის კუნძული იმ რეგიონში, სადაც გარშემო ახალი კონფლიქტები იწყება და მწვავდება. და მესამე, საქართველოს მოწყობა, მმართველობა არის ერთ-ერთი წარმატებული და ყველა ობიექტური საერთაშორისო კვლევა აჩვენებს, რომ იქნება ეს კორუფციის დაბალი დონე, კარგი მმართველობის რეიტინგები საქართველო არის ლიდერი. სწორედ ამ პირობების გამო საქართველოში არის შექმნილი კარგი საინვესტიციო გარემო და ეკონომიკურად მიმზიდველი არის საქართველო ყველასთვის.

რა თქმა უნდა, ეს პროექტი სწორედ ამაზე მეტყველებს, როდესაც ტრამპის კომპნაია საკუთარი ბრენდით შემოდის საქართველოში, რაც ნიშნავს, რომ ის კარგად იცნობს გარემოს, რაც არის. რა თქმა უნდა, ტრამპი და მისი კომპანია უფრთხილდება რეპუტაციას, რომელიც მას აქვს დაგროვილი. სწორედ ამ რეპუტაციით შემოდის ამ ბიზნესპროექტში, რაც არის მნიშვნელოვანი, სხვა მიმართულებით ინვესტიციის მოზიდვისთვისაც მნიშვნელოვანია, როდესაც ასეთი ბრენდი შემოდის და ნდობას უცხადებს, უპირველეს ყოვლისა, საქართველოს და მის შესაძლებლობებს. შესაბამისად, წაახალისებს არა მხოლოდ ინვესტიციებს, არამედ უძრავი ქონების ბაზარზე ახალ სტანდარტს შემოიტანს", — თქვა შალვა პაპუაშვილმა.

შეგახსენებთ, The Trump Organization-ის ცნობით, მათთან თანამშრომლობით, კომპანიები Biograpi Living, Archi, The Sapir Organization, Blox და Finvest Georgia პროექტ Trump Tower Tbilisi-ს მშენებლობას აანონსებენ.

როგორც ტრამპის ორგანიზაცია წერს, შენობის დიზაინზე მსოფლიოს უმსხვილესმა არქიტექტურულმა ფირმა Gensler-მა იმუშავა. მათივე ინფორმაციით, დაგეგმილია, რომ ცათამბჯენი დაახლოებით 70-სართულიანი უნდა იყოს, რითაც ის საქართველოში ყველაზე მაღალი ნაგებობა გახდება.