გენერალურ პროკურატურასთან შეკრებილ ჭიათურელ მაღაროელებს სამართალდამცავებმა აქციის ჩატარების უფლება არ მისცეს. ამის შესახებ მაღაროელმა ტარიელ მიქაცაძემ დღეს გენერალურ პროკურატურასთან განაცხადა. მისი თქმით, პოლიციამ მათ აქციის ჩატარების უფლება მხოლოდ პროკურატურისგან მოშორებით მისცა.

"მინდა მოვუწოდო ყველას, რომ [შეკრება-მანიფესტაციის შემზღუდველი] კანონები თავიდან იმ ფორმით მიიღეს, რომ ვითომ უწყინარი იყო, მაგრამ, ისე ამკაცრებენ ნელ-ნელა და ისე უჭერენ მოსახლეობას მარწუხებს, რომ ბოლოს ერთი დიდი აფეთქების ტალღა იქნება საჭირო, რათა ეს უსამართლოდ მიღებული კანონები პირწმინდად განულდეს," — განაცხადა ჭიათურელმა მაღაროელმა, ტარიელ მიქაცაძემ.

შეგახსენებთ, 20 იანვარს, მოსამართლე თამარ მაზნიაშვილმა 4 ჭიათურელ მაღაროელს, ჯგუფური ძალადობის ბრალდებით, პატიმრობა მიუსაჯა. ჯგუფური ძალადობის ორგანიზებით და მასში მონაწილეობისთვის დაკავებულ გიორგი ნეფარიძეს და მერაბ სარალიძეს 6 წლითა და 3 თვით პატიმრობა მიესაჯათ. ჯგუფურ ძალადობაში მონაწილეობის ბრალდებით დაკავებულ არჩილ ჭუმბურიძეს და თენგიზ გველესიანს — 4 წლითა და 3 თვით თავისუფლების აღკვეთა.

მაღაროელებს 28 აპრილის ღამეს მომხდარი ინციდენტის გამო ედავებოდნენ, როდესაც პროტესტის მონაწილეები და შუქრუთის მაღაროს დირექტორი თენგიზ კობერიძე ერთმანეთს დაუპირისპირდნენ.

გარდა ამისა, 16 მარტს, მაღაროელებმა, ჭიათურაში არსებული ვითარებასთან დაკავშირებით, ირაკლი კობახიძე და მარიამ ქვრივიშვილი საჯარო დებატებში მიიწვიეს. პროსამთავრობო ტელეკომპანია "რუსთავი 2-ის" ეთერში გამართული "დებატების" დროს ბერდია სიჭინავამ ირაკლი კობახიძეს ჰკითხა — აპირებდა თუ არა ჭიათურელ მაღაროელებთან ერთად დებატებში მონაწილეობის მიღებას, რაზეც კობახიძემ უპასუხა, რომ "მაღაროელების და მთავრობის ხელმძღვანელის დებატები საერთოდ ანომალიაა".