ესპანეთი კატალონიას ავტონომიის სტატუსს შეუჩერებს, თუ რეგიონის ხელმძღვანელი, კარლეს პუჩდემონი დამოუკიდებლობის გამოცხადებას არ გადაიფიქრებს. ამის შესახებ ქვეყნის ვიცე-პრემიერმა, პუჩდემონისთვის მიცემული ულტიმატუმის ვადის გასვლამდე, ერთი დღით ადრე განაცხადა. კატალონიაში აცხადებენ, რომ ისინი არ აპირებენ მადრიდთან დათმობებზე წასვლას.

პირველი ოქტომბრის რეფერენდუმის შემდეგ პუჩდემონიმ დამოუკიდებლობის დეკლარაციას ხელი მოაწერა, მაგრამ განაცხადა, რომ დოკუმენტი ჯერ ძალაში არ შევიდოდა. მან მადრიდის ხელისუფლებას დიალოგისკენ მოუწოდა.

ესპანეთის პრემიერ-მინისტრმა, მარიანო რახოიმ კატალონიის ლიდერს ხუთშაბათამდე მისცა ვადა, რათა დამოუკიდებლობასთან დაკავშირებით კონკრეტული პასუხი გასცეს. წინააღმდეგ შემთხვევაში ცენტრალური ხელისუფლება კონსტიტუციის 155-ე მუხლის შესაბამისად იმოქმედებს.

155-ე მუხლი, რომელიც 1978 წელს მიიღეს, მადრიდს უფლებას აძლევს, რომ კრიზის სიტუაციაში პირდაპირი მმართველობა გამოიყენოს. დემოკრატიული ესპანეთის არსებობის განმავლობაში ეს მუხლი არასდროს გამოყენებულა.

"ერთადერთი, რასაც ვთხოვ ბატონ პუჩდემონის, ეს გონივრულად მოქცევა და ყველა ესპანელის ინტერესების გათვალისწინებაა", - განაცხადა რახოიმ.

კატალონიაზე მმართველობის ძალაუფლების მადრიდისთვის გადაცემა ესპანეთის სენატმა უნდა განიხილოს, რომლის უმრავლესობას რახოის სახალხო პარტია წარმოადგენს. ცენტრალურ ხელისუფლებას ექნება შესაძლებლობა გააკონტროლოს რეგიონის პოლიცია და ვადამდელი არჩევნებიც ჩაატაროს. თუმცა როგორც ადგილობრივი მედია ამბობს, ვადამდელი არჩევნების საკითხი ჯერ არ განიხილება.

კატალონიის რეფერენდუმი

კატალონიის დამოუკიდებლობის შესახებ რეფერენდუმი, რომელსაც არ აღიარებს მადრიდი და არც ევროკავშირი, ჯერ კიდევ ჩატარებამდე გამოაცხადა არაკონსტიტუციურად ესპანეთის საკონსტიტუციო სასამართლომ. ესპანეთის ერთიანობას დაუჭირეს მხარი გერმანიამ და საფრანგეთმა.

ცენტრალური ხელისუფლების მიერ არაღიარებული რეფერენდუმის შედეგების მიხედვით, კატალონიელების 90-მა პროცენტმა დამოუკიდებლობას დაუჭირა მხარი. ამავე დროს, მოქალაქეების აქტივობა 43 პროცენტს შეადგენდა.

მადრიდის განკარგულებით პოლიცია რეფერენდუმის ჩაშლას ცდილობდა, რასაც დაპირისპირება მოჰყვა. პოლიცია საარჩევნო უბნებში შეიჭრა და ყუთები გაიტანა, ასევე, დალუქა რამდენიმე საარჩევნო უბანი. საერთო ჯამში, პოლიციელებთან შეტაკებებისას 900 მოქალაქე დაშავდა.

მოგვიანებით, ესპანეთის ხელისუფლებამ უხეში ძალის გამოყენებისთვის კატალონიას ბოდიში მოუხადა და ამავე დროს, არაკანონიერი რეფერენდუმის ჩატარებაში რეგიონის ლიდერებს ბრალი დასდო.

კატალონია ესპანეთის ავტონომიური გაერთიანებაა, რომლის მოსახლეობა 7,5 მილიონია. მას აქვს საკუთარი ენა და დროშა. ესპანეთიდან გამოყოფის იდეა ბოლო ხუთი წლის განმავლობაში საკმაოდ პოპულარული გახდა.

2014 წელს ესპანეთის ხელისუფლებამ კატალონიაში რეფერენდუმის ჩატარება დაბლოკა. ერთი წლის შემდეგ, კატალონიის ხელისუფლებაში დამოუკიდებლობის მომხრე პარტია მოვიდა. 2017 წლის ივნისში ცნობილი გახდა, რომ პირველ ოქტომბერს კატალონიის ესპანეთიდან გამოყოფისა და მისი რესპუბლიკად ჩამოყალიბების რეფერენდუმი ჩატარდებოდა.