კატალონიის პრეზიდენტმა კარლეს პუჩდემონიმ განაცხადა, რომ კატალონიამ მოიპოვა უფლება იყოს დამოუკიდებელი სახელმწიფო. ოფიციალური პირების თქმით, რეფერენდუმში მონაწილეთა 90-მა პროცენტმა კატალონიის დამოუკიდებლობას მხარი დაუჭირა. ამასთანავე, რეფერენდუმში მოსახლეობის 42,3 პროცენტმა მიიღო მონაწილეობა.

"უახლოეს რამდენიმე დღეში ჩემი მთავრობა კატალონიის პარლამენტში რეფერენდუმის შედეგებს გადაგზავნის, რათა მან რეფერენდუმის კანონის შესაბამისად იმოქმედოს", - განაცხადა პუჩდემონიმ.

რეფერენდუმის შესახებ კანონის მიხედვით, რომელიც კატალონიამ ექვს სექტემბერს მიიღო და ესპანეთის საკონსტიტუციო სასამართლომ გააუქმა, ოფიციალური შედეგების გამოცხადებიდან ორ დღეში პარლამენტმა უნდა გამართოს სხდომა, რათა დამოუკიდებლობის გამოცხადება განიხილოს.

ოფიციალური მადრიდი რეფერენდუმს არაკონსტიტუციურს უწოდებს და მის შედეგებს არ აღიარებს. პირველ ოქტომბერს, მთელი დღის განმავლობაში ესპანური პოლიცია ცდილობდა, რომ რეფერენდუმის ჩატარებისთვის ხელი შეეშალა, იყო დაპირისპირება მოსახლეობასა და ძალოვან სტრუქტურებს შორის.

პოლიციამ რამდენიმე საარჩევნო უბანი დახურა და მოსახლეობას ბიულეტენები ჩამოართვა.

კატალონიის ხელისუფლების თქმით, შეტაკებების დროს პოლიციამ რეზინის ტყვიები გამოიყენა, ასევე დაშავდა 800-ზე მეტი მოქალაქე. მადრიდი დაშავებულ მოქალაქეებზე ინფორმაციას არ ავრცელებს, თუმცა შსს-ს თქმით, 12 პოლიციელი დაშავდა, ხოლო სამი დემონსტრანტი დააკავეს.

ხმის მიცემის ოფიციალური დროის დასრულების შემდეგ, ესპანეთის პრემიერ-მინისტრმა განაცხადა, რომ კატალონიის ხელისუფლებამ ხალხი მოატყუა, რადგან რეფერენდუმში მონაწილეობისკენ მოუწოდა.

ბარსელონის მერმა მადრიდის ქმედებები გააკრიტიკა, ხოლო ესპანეთის ვიცე-პრემიერმა განაცხადა, რომ პოლიციელების ქმედება "ადეკვატური და პროფესიონალური" იყო.

კატალონია ესპანეთის ავტონომიური გაერთიანებაა, რომლის მოსახლეობა 7,5 მილიონია. მას აქვს საკუთარი ენა და დროშა. ესპანეთიდან გამოყოფის იდეა ბოლო ხუთი წლის განმავლობაში საკმაოდ პოპულარული გახდა.

2014 წელს ესპანეთის ხელისუფლებამ კატალონიაში რეფერენდუმის ჩატარება დაბლოკა. ერთი წლის შემდეგ, კატალონიის ხელისუფლებაში დამოუკიდებლობის მომხრე პარტია მოვიდა. 2017 წლის ივნისში ცნობილი გახდა, რომ პირველ ოქტომბერს კატალონიის ესპანეთიდან გამოყოფისა და მისი რესპუბლიკად ჩამოყალიბების რეფერენდუმი ჩატარდებოდა.