ირანის საგარეო საქმეთა მინისტრმა. აბას არაღჩიმ განაცხადა, რომ დემონსტრანტების ჩამოხრჩობის გეგმები "არ არსებობს". მან ბოლო პერიოდში ისლამურ რესპუბლიკაში მიმდინარე საპროტესტო გამოსვლების ფონზე მასობრივი მსხვერპლის შესახებ გავრცელებული ცნობები უარყო და განაცხადა, რომ ნებისმიერი მკვლელობა, "ისრაელის შეთქმულების" შედეგია, რომლის მიზანიც დიდი რაოდენობით მსხვერპლის გამოწვევა იყო. ამის შესახებ ინფორმაციას Fox News ავრცელებს.

ირანის უმაღლესი დიპლომატის თქმით, დაღუპულთა რაოდენობა მხოლოდ რამდენიმე ასეულია.

"როდესაც გარედან მართული ტერორისტული ელემენტები შეიჭრნენ ამ, როგორც თქვენ ამბობთ, პროტესტებში და დაიწყეს პოლიციის ძალებისთვის, პოლიციელებისა და უსაფრთხოების ძალებისთვის სროლა. არსებობდა ტერორისტული უჯრედები. ისინი მოქმედებდნენ "დაეშის" სტილის ტერორისტული ოპერაციებით — პოლიციელებს ცოცხლად წვავდნენ, თავებს სჭრიდნენ და ესროდნენ როგორც პოლიციელებს, ასევე მოქალაქეებს. შედეგად, სამი დღის განმავლობაში ჩვენ ფაქტობრივად ტერორისტებს ვებრძოდით და არა მომიტინგეებს," — თქვა არაღჩიმ.

არაღჩის თქმით, ამ არაკონტროლირებად, ტერორისტული ხასიათის მქონე ჯგუფებმა მშვიდობიანი მოქალაქეებითვის სროლა "ერთი მიზეზის გამო" დაიწყეს — რათა შეერთებული შტატები კონფლიქტში ჩაეთრიათ.

"მათ სურდათ მსხვერპლის რაოდენობის გაზრდა. რატომ? იმიტომ, რომ პრეზიდენტმა ტრამპმა განაცხადა — თუ მკვლელობები მოხდებოდა, ის ჩაერეოდა. და მათ სურდათ მისი ამ კონფლიქტში ჩათრევა... და ეს ზუსტად ისრაელის შეთქმულება იყო. მათ დაიწყეს დაღუპულთა რიცხვის გაზრდა რიგითი მოქალაქეების მკვლელობით, პოლიციელების მკვლელობით და ერთგვარი შიდა ბრძოლების გაჩაღებით სხვადასხვა ქალაქში," — თქვა ირანის საგარეო საქმეთა მინისტრმა.

ირანის საგარეო საქმეთა მინისტრმა ასევე დაჟინებით განაცხადა, რომ მომიტინგეთა ჩამოხრჩობის ან სხვა ფორმით დასჯის დაუყოვნებელი გეგმები არ არსებობს. მან სცადა ქვეყანაში მიმდინარე არეულობის მნიშვნელობის დაკნინებაც და აღნიშნა, რომ ვითარება ამჟამად "დამშვიდებულია".

"ჩვენ სრულად ვაკონტროლებთ სიტუაციას და ვიმედოვნოთ, რომ გონიერება გაიმარჯვებს და ჩვენ არ მივალთ მაღალი დონის დაძაბულობამდე, რაც ყველასთვის კატასტროფული შეიძლება იყოს", — დასძინა არაღჩიმ.

ცნობითვის, ირანში დემონსტრაციები 2025 წლის 28 დეკემბერს დაიწყო. იმ დღეს, თეირანში მაღაზიების მეპატრონეებმა ეკონომიკური მდგომარეობის გაუარესების გამო პროტესტის ნიშნად თავიანთი ბიზნესები დახურეს. მოგვიანებით, საპროტესტო აქციებს სხვა მსხვილი ქალაქების მაცხოვრებლებიც შეუერთდნენ.

მეტი ირანში განვითარებულ მოვლენებზე: