ევროკავშირმა განაცხადა, რომ დეკემბერში მაიამიში დაგეგმილ G20-ის სამიტზე უკრაინაში რუსეთის ომის დაგმობას კვლავაც გააგრძელებს. ინფორმაციას Deutsche Welle ავრცელებს.

ევროკავშირის თქმით, ეს იმის მიუხედავად მოხდება, დაესწრება თუ არა სამიტს რუსეთის პრეზიდენტი ვლადიმერ პუტინი. შეგახსენებთ, რომ წლევანდელმა მასპინძელმა ქვეყანამ, შეერთებული შტატებმა რუსეთის პრეზიდენტს მოწვევა გაუგზავნა. კრემლი აცხადებს, რომ პუტინი ვაშინგტონის მოწვევას "განიხილავს".

რუსეთის ლიდერი არ დასწრებია 2023 წელს ნიუ-დელიში (ინდოეთი) და 2022 წელს ინდონეზიის კუნძულ ბალიზე გამართულ G20-ის სამიტებს, მიუხედავად იმისა, რომ მასპინძელი ქვეყნებისგან ოფიციალური მოწვევა ჰქონდა.

ევროკავშირმა განაცხადა, რომ ის უკრაინაში ომის დასრულებისკენ მოწოდებას გააგრძელებს.

"2022 წლის შემდეგ, ევროკავშირი თანმიმდევრულად და მტკიცედ იყენებდა G20-ის შეხვედრებს, რათა დაეგმო რუსეთის სრულმასშტაბიანი შეჭრა [უკრაინაში] და მოეწოდებინა მისი დასრულებისკენ.

დღეს შემიძლია ვთქვა, რომ ეს მიდგომა, ევროკავშირის პერსპექტივიდან გაგრძელდება მიუხედავად იმისა, თუ ვინ იქნება G20-ის რომელიმე შეხვედრის მონაწილე", — განაცხადა ევროკავშირის სპიკერმა ოლოფ გილმა.

გილმა აღნიშნა, რომ რუსეთი რჩება G20-ის ჯგუფის წევრად და მას "შეხვედრებში მონაწილეობის უფლება" აქვს.