ევროკომისიამ საკანონმდებლო წინადადებების პაკეტი მიიღო, რომლის მიზანი უკრაინისთვის უწყვეტი ფინანსური მხარდაჭერის უზრუნველყოფაა 2026 და 2027 წლებში. ამის შესახებ ინფორმაციას ევროკომისია ავრცელებს.

მათი ცნობით, საკანონმდებლო პაკეტი მოიცავს:

  • უკრაინისთვის დახმარების სესხის დადგენის ახალი წინადადება (ევროპის ეკონომიკური კონვენციის 212-ე მუხლის საფუძველზე) 90 მილიარდი ევროს ოდენობით.

  • უკრაინის ფინანსური ინსტრუმენტის შესწორების ახალი წინადადება (ევროპის ეკონომიკური კონვენციის 212-ე მუხლის საფუძველზე), როგორც უკრაინისთვის საბიუჯეტო დახმარების განხორციელების ერთ-ერთი საშუალება.

  • მრავალწლიანი ფინანსური ჩარჩო რეგულაციის შესწორების ახალი წინადადება (ევროპის ეკონომიკური კონვენციის 312-ე მუხლის საფუძველზე), რათა უკრაინისთვის სესხის დაფარვა ევროკავშირის ბიუჯეტის "ხელმისაწვდომი რესურსებიდან" იყოს შესაძლებელი.

დეკემბერში ევროპული საბჭო შეთანხმდა, რომ მომდევნო ორი წლის განმავლობაში უკრაინის საბიუჯეტო და სამხედრო საჭიროებებისთვის €90 მილიარდის ოდენობის გადამწყვეტი მხარდაჭერა გამოეყო. ეს შეთანხმება კიდევ ერთხელ ადასტურებს ევროკავშირის ურყევ ვალდებულებას უკრაინის მხარდაჭერის მიმართ.

ევროკომისია წერს, რომ ეს ფინანსური ვალდებულება €90 მილიარდის ოდენობის შეზღუდული პასუხისმგებლობის მქონე სესხის სახით 2026 და 2027 წლებისთვის განხორციელდება. შემოთავაზებული მხარდაჭერა ორ კომპონენტად დაიყოფა: დაახლოებით ორი მესამედი, ანუ €60 მილიარდი, სამხედრო დახმარებაზე იქნება მიმართული, ხოლო დარჩენილი ერთი მესამედი — €30 მილიარდი — უკრაინის საერთო საბიუჯეტო მხარდაჭერას მოხმარდება. ეს ნაბიჯი უკრაინას თავდაცვის შესაძლებლობების გაძლიერებაში დაეხმარება და სახელმწიფოსა და ძირითადი საჯარო სერვისების უწყვეტ ფუნქციონირებაში, ასევე გააძლიერებს ქვეყნის მდგრადობას და მის უფრო მჭიდრო ინტეგრაციას ევროპის თავდაცვით ინდუსტრიულ ბაზასთან.

ევროკომისიის ცნობით, საკანონმდებლო წინადადებები ევროპარლამენტსა და საბჭოს გადაეგზავნა, რათა დაიწყოს მათი განხილვისა და მიღების საკანონმდებლო პროცესი. იმისათვის, რომ ევროკომისიამ უკრაინისთვის ფინანსური მხარდაჭერის გაწევა 2026 წლის მეორე კვარტლიდან შეძლოს.

როგორც უკრაინისთვის ევროკავშირის სხვა ფინანსური მხარდაჭერის მექანიზმების შემთხვევაში, ეს პაკეტიც მკაცრ პირობითობაზე იქნება დაფუძნებული. ეს მოიცავს კანონის უზენაესობის გაძლიერებასა და კორუფციასთან ბრძოლის ღონისძიებებს, რომლებიც უკრაინის გეგმაშია გათვალისწინებული (Ukraine Plan).