2026 წელს კინოთეატრებში არაერთი დიდი სტუდიური პროექტის პრემიერაა დაგეგმილი. ჩამონათვალში შედის როგორც ცნობილი ფრენჩაიზების გაგრძელებები და პრიქველები, ისე ახალი კინოადაპტაციები და საავტორო ფილმები, რომელთა გამოსვლაც ოფიციალურად არის დადასტურებული:

1. Greenland: Migration

პრემიერის თარიღი: 2026 წლის 9 იანვარი

2020 წელს გამოსული Greenland-ის გაგრძელებაში ჯეარდ ბატლერი და მორენა ბაკარინი თავიანთ როლებს უბრუნდებიან. სიუჟეტი გადარჩენილთა ოჯახზე მოგვითხრობს, რომელიც ბუნკერს ტოვებს და განადგურებულ ევროპაში ახალი თავშესაფრის საძიებლად მიემგზავრება.

2. People We Meet on Vacation

პრემიერის თარიღი: 2026 წლის 9 იანვარი

მალე ემილი ჰენრის პოპულარული რომანის ეკრანიზაციას ვიხილავთ, რომელშიც მთავარ როლებს ტომ ბლაითი და ემილი ბეიდერი ასრულებენ. ფილმი მოგვითხრობს ორ საუკეთესო მეგობარზე, რომლებიც ყოველ წელს ერთად ისვენებენ, მიუხედავად იმისა, რომ სრულიად განსხვავებული ხასიათი აქვთ.

3. Dead Man’s Wire

პრემიერის თარიღი: 2026 წლის 16 იანვარი

გას ვან სენტის კრიმინალური დრამა 1977 წელს მომხდარ რეალურ ამბავს ეფუძნება. ტონი კირიტისმა, რომლის როლსაც ბილ სკარსგარდი ასრულებს, იპოთეკის ბროკერი 63 საათის განმავლობაში მძევლად აიყვანა, რაც ამერიკის ისტორიაში ერთ-ერთი ყველაზე გახმაურებული მოვლენა გახდა.

4. Return to Silent Hill

პრემიერის თარიღი: 2026 წლის 22 იანვარი

რეჟისორი კრისტოფერ განსი ფრენჩაიზს ახალი, დამოუკიდებელი პროექტით უბრუნდება. ფილმი წარმოადგენს საკულტო ვიდეოთამაშის, Silent Hill 2-ის ეკრანიზაციას და წინა ფილმების პირდაპირი გაგრძელება არ არის. ის მოგვითხრობს ჯეიმს სანდერლენდზე, რომელიც იდუმალი წერილის მიღების შემდეგ საყვარელი ქალის საძებნელად ნისლიან ქალაქში ბრუნდება.

5. Wuthering Heights

პრემიერის თარიღი: 2026 წლის 13 თებერვალი

ემერალდ ფენელი ემილი ბრონტეს კლასიკას ახლებური, გაბედული ხედვით აცოცხლებს. ფილმში მთავარ როლებს მარგო რობი და ჯეიკობ ელორდი ასრულებენ, სიუჟეტი კი ვიზუალურად შთამბეჭდავია და თანამედროვე ინტერპრეტაციით გადმოგვცემს კეტრინისა და ჰითკლიფის სიყვარულის ტრაგიკულ ისტორიას.

6. Scream 7

პრემიერის თარიღი: 2026 წლის 27 თებერვალი

ფრენჩაიზის მეშვიდე ნაწილში საკულტო პერსონაჟი სიდნი პრესკოტი ბრუნდება, რომლის როლსაც კვლავ ნივ კემპბელი მოირგებს. რეჟისორი კევინ უილიამსონი მაყურებელს Ghostface-ის მორიგ, გასაიდუმლოებულ და სისხლიან ისტორიას სთავაზობს.

7. Hoppers

პრემიერის თარიღი: 2026 წლის 6 მარტი

Disney და Pixar წარმოგვიდგენენ ორიგინალურ ანიმაციას გოგონაზე, რომელიც სამეცნიერო ექსპერიმენტის წყალობით, გონებას რობოტი თახვის სხეულში გადაიტანს. ფილმი იუმორისტულ სტილში იკვლევს კავშირს ადამიანებსა და ბუნებას შორის, რაც მთავარ გმირს ცხოველთა სამყაროს სულ სხვა თვალით დაანახებს.

8. The Bride!

პრემიერის თარიღი: 2026 წლის 6 მარტი

მეგი ჯილენჰოლი მაყურებელს ფრანკენშტეინის პატარძლის ისტორიის პანკ-როკ ვერსიას სთავაზობს, სიუჟეტი კი 1930-იანი წლების ჩიკაგოში ვითარდება. ფილმში კრისტიან ბეილი მონსტრის, ხოლო ჯესი ბაკლი მკვდრეთით აღმდგარი ქალის როლს ასრულებს, რაც კლასიკურ მითს სრულიად ახალ სიცოცხლეს სძენს.

9. Peaky Blinders: The Immortal Man

პრემიერის თარიღი: 2026 წლის 6 მარტი

სტივენ ნაიტის საკულტო სერიალის სიუჟეტური გაგრძელება ტომ ჰარპერის რეჟისორობით დიდ ეკრანზე გადაინაცვლებს. ფილმში კილიან მერფი კვლავ ტომი შელბის როლს მოირგებს, მასთან ერთად კი სამსახიობო ჯგუფს რებეკა ფერგიუსონი, ტიმ როტი და ბარი კიოგანი შეუერთდებიან. მოქმედება მეორე მსოფლიო ომის პერიოდში, დაბომბილ ბირმინგემში ვითარდება, სადაც ტომი რეალურ ამბებზე დაფუძნებულ საიდუმლო მისიებში ერთვება და ეროვნული მასშტაბის საფრთხის წინაშე დგება.

10. The Super Mario Galaxy Movie

პრემიერის თარიღი: 2026 წლის 3 აპრილი

Nintendo-სა და Illumination-ის ერთობლივი ანიმაციური პროექტი 2023 წლის ჰიტის პირდაპირი გაგრძელებაა. ამჯერად მარიოსა და მისი მეგობრების თავგადასავალი კოსმოსურ მასშტაბებს იძენს, სადაც მათ ახალი პლანეტების აღმოჩენა და გალაქტიკათშორისი საფრთხეების დაძლევა მოუწევთ. პერსონაჟებს კვლავ კრის პრატი, ანია ტეილორ-ჯოი და ჩარლი დეი ახმოვანებენ.

11. The Drama

პრემიერის თარიღი: 2026 წლის 3 აპრილი

რეჟისორი კრისტოფერ ბორგლი ზენდეიასა და რობერტ პატინსონის მონაწილეობით დრამატული ელემენტებით დატვირთულ რომენტიკულ კომედიას გვთავაზობს. სიუჟეტი მოგვითხრობს წყვილზე, რომლის იდეალური ურთიერთობა ქორწილამდე ცოტა ხნით ადრე, ერთი მოულოდნელი საიდუმლოს გამო, რადიკალურად იცვლება.

12. The Mummy

პრემიერის თარიღი: 2026 წლის 17 აპრილი

Universal Pictures კლასიკურ ფრენჩაიზს თანამედროვე ვერსიით დიდ ეკრანზე აბრუნებს. ფილმი მიზნად ისახავს მუმიის ლეგენდაში საშინელებათა ჟანრის თავდაპირველი ელემენტებისა და მასშტაბური სათავგადასავლო მოქმედებების გაერთიანებას.

13. Michael

პრემიერის თარიღი: 2026 წლის 24 აპრილი

რეჟისორ ანტუან ფუკუას ბიოგრაფიული დრამა პოპ-მუსიკის მეფის, მაიკლ ჯექსონის, ცხოვრებას ეძღვნება. მთავარ როლს მუსიკოსის ძმისშვილი, ჯაფარ ჯექსონი ასრულებს, ფილმი კი მაყურებელს უყვება მაიკლის გზის შესახებ, ბავშვობიდან მსოფლიო აღიარებამდე.

14. The Devil Wears Prada 2

პრემიერის თარიღი: 2026 წლის 1-ლი მაისი

საკულტო ფილმის გაგრძელებაში მერილ სტრიპი, ენ ჰეთეუეი და ემილი ბლანტი თავიანთ დაუვიწყარ როლებს უბრუნდებიან. ამჯერად სიუჟეტი თანამედროვე მედიის კრიზისს ეხება: როგორ უმკლავდება ტრადიციული ჟურნალი ციფრულ ეპოქასა და ინფლუენსერების სამყაროს.

15. Mortal Kombat 2

პრემიერის თარიღი: 2026 წლის 8 მაისი

ვიდეოთამაშის პოპულარული ეკრანიზაციის გაგრძელება კიდევ უფრო მეტ ყურადღებას დაუთმობს ტურნირებსა და საკულტო პერსონაჟებს. ფილმში ვიხილავთ ახალ გმირებს, მათ შორის ჯონი კეიჯს, რომლის როლსაც კარლ ურბანი ასრულებს.

16. The Mandalorian & Grogu

პრემიერის თარიღი: 2026 წლის 22 მაისი

ჯონ ფავროს რეჟისორობით Star Wars-ის სამყარო დიდ ეკრანზე სრულმეტრაჟიანი ფილმით ბრუნდება. სიუჟეტი პოპულარული სერიალის პერსონაჟების თავგადასავალს აგრძელებს და მანდალორელისა და პატარა გროგუს ახალ, სახიფათო მისიაზე მოგვითხრობს.

17. Supergirl: Woman of Tomorrow

პრემიერის თარიღი: 2026 წლის 19 ივნისი

ჯეიმს განის განახლებული DC სამყარო მაყურებელს სუპერგოგონას ახალ ისტორიას სთავაზობს, რომელშიც მთავარ როლს მილი ალკოკი ასრულებს. ფილმი წარმოადგენს მასშტაბურ კოსმოსურ თავგადასავალს, რომელიც პერსონაჟის უფრო მძაფრ და მებრძოლ მხარეს წარმოაჩენს.

18. Toy Story 5

პრემიერის თარიღი: 2026 წლის 19 ივნისი

Pixar-ის საკულტო სერიის მეხუთე ნაწილში ვუდი და ბაზ ლაითერი კვლავ ერთიანდებიან. ამჯერად სათამაშოებს სრულიად ახალ რეალობასთან მოუწევთ შეჯახება, სადაც ბავშვების ყურადღების მოპოვებაში მათი მთავარი კონკურენტები თანამედროვე მოწყობილობები ხდებიან.

19. Moana

პრემიერის თარიღი: 2026 წლის 10 ივლისი

დისნეის პოპულარული ანიმაციის "ლაივ-ექშენ" ვერსია მაყურებელს კვლავ ოკეანეთში ეპატიჟება. დუეინ ჯონსონი კვლავ მაუის როლს მოირგებს, ფილმი კი მსახიობებისა და ეფექტების დახმარებით გააცოცხლებს მოანას თავგადასავალს.

20. The Odyssey

პრემიერის თარიღი: 2026 წლის 17 ივლისი

კრისტოფერ ნოლანის ახალი, საიდუმლოებით მოცული პროექტი ჰომეროსის უკვდავი ეპოსის ერთგვარი ინტერპრეტაციაა. ვარსკვლავურ ქასთთან ერთად, რომელშიც შედიან მეტ დეიმონი, ტომ ჰოლანდი, ენ ჰეთეუეი, ზენდეია და რობერტ პატინსონი, ეს იქნება პირველი ფილმი კინოს ისტორიაში, რომელიც მთლიანად IMAX კამერებითაა გადაღებული.

21. Spider-Man: Brand New Day

პრემიერის თარიღი: 2026 წლის 31 ივლისი

ტომ ჰოლანდის მონაწილეობით Marvel-ის სამყაროში ადამიანი ობობას ახალი თავი იწყება. ფილმი No Way Home-ის მოვლენების შემდეგ ვითარდება და პიტერ პარკერის ცხოვრების სრულიად ახალ ეტაპს ასახავს, რომელშიც მას ძველ მეგობრებთან და განსხვავებულ საფრთხეებთან გამკლავება მოუწევს.

22. Street Fighter

პრემიერის თარიღი: 2026 წლის 16 ოქტომბერი

ლეგენდარული საბრძოლო თამაშის ახალი კინოადაპტაცია ფრენჩაიზის განახლებულ ვერსიას გვთავაზობს. ფილმი ორიენტირებული იქნება უფრო რეალისტურ საბრძოლო ხელოვნებასა და პერსონაჟების ისტორიებზე.

23. The Chronicles of Narnia: The Magician's Nephew

პრემიერის თარიღი: 2026 წლის 18 დეკემბერი

ბარბის წარმატების შემდეგ, გრეტა გერვიგი ნარნიის ქრონიკებს ეჭიდება. გერვიგის ჯადოქრის დისწული წინა ფილმების პრიქველია და ნარნიის სამყაროს შექმნის ისტორიას მოგვიყვება. რეჟისორი აპირებს, რომ ამ ფილმით ისეთივე ხელშესახები და ფერადი სამყარო შექმნას, როგორიც მის წინა პროექტებში ვიხილეთ.

24. Avengers: Doomsday

პრემიერის თარიღი: 2026 წლის 18 დეკემბერი

Marvel-ის სამყაროს ყველაზე მასშტაბური მოვლენა რობერტ დაუნი უმცროსის დაბრუნებას უკავშირდება, რომელიც ამჯერად ბოროტმოქმედი დოქტორ დუმის როლს მოირგებს. ფილმი, რომელსაც ძმები რუსოები იღებენ, შურისმაძიებლების ახალ შემადგენლობას უდიდესი საფრთხის წინაშე აყენებს.

25. Dune 3

პრემიერის თარიღი: 2026 წლის 18 დეკემბერი

დენი ვილნევი თავის ეპიკურ ტრილოგიას ფრენკ ჰერბერტის დიუნის მესიის მიხედვით ასრულებს. ფილმი პოლ ატრეიდესის ისტორიის კულმინაციაა, სადაც ის საკუთარი წინასწარმეტყველების შედეგებსა და სამყაროს მმართველობის მძიმე ტვირთს უპირისპირდება.

26. The Hunger Games: Sunrise on the Reaping

პრემიერის თარიღი: 2026 წლის 20 ნოემბერი

შიმშილის თამაშების ახალი პრიქველი მაყურებელს 24 წლით უკან აბრუნებს და ახალგაზრდა ჰეიმიჩ აბერნათის ისტორიას უყვება. სიუჟეტი ფოკუსირებულია 50-ე შიმშილის თამაშებზე, სადაც ჰეიმიჩს პანემის ყველაზე სასტიკ პირობებში გადარჩენა უწევს.