თბილისის წიგნის დღეები ერთგული მკითხველისთვის დიდი დღესასწაულია. წელს 14-16 ნოემბერს უამრავი ადამიანი მოინახულებს პავილიონს, ხოლო ქართული გამომცემლობები ტრადიციულად სიახლეებით დახვდებიან მათ. ქარჩხაძის გამომცემლობა ერთგულ მკითხველს რამდენიმე სიახლეს უმზადებს და მათ შორის ერთ-ერთი ქართული ჰაგიოგრაფიის განახლებული გამოცემაა.

ქართული ჰაგიოგრაფია ქარჩხაძის გამომცემლობის თითქმის ყველაზე ცნობილი წიგნია, რომელიც პირველად 2016 წელს გამოიცა და მაშინვე დაიმსახურა მკითხველთა დიდი ყურადღება. წიგნში თავდაპირველად წარმოდგენილი იყო ქართული ჰაგიორგაფიის სამი მნიშვნელოვანი ძეგლი — შუშანიკის წამება, აბოს წამება, გრიგოლ ხანძთელის ცხოვრება.

მკითხველთა განსაკუთრებულ ყურადღებას იმსახურებს წიგნის კონცეფცია — ორიგინალი, ძველი ქართული ტექსტების პარალელურად წარმოდგენილია მათი თანამედროვე ქართულ ენაზე შესრულებული უზუსტესი ვერსიებიც. წიგნის თითოეული ტექსტის შესავალი წერილები ლევან გიგინეიშვილს ეკუთვნის, ხოლო ტექსტების თანამედროვე ქართულ ენაზე შესრულებული ვერსიები, ლეილა ბერიაშვილს.

განახლებულ გამოცემაში წარმოდგენილია არა მხოლოდ შუშანიკის წამების, აბოს წამებისა და გრიგოლ ხანძთელის ცხოვრების ტექსტები, არამედ დამატებულია არანაკლებ მნიშვნელოვანი ჰაგიოგრაფიული ძეგლი — იოანეს და ექვთიმეს ცხოვრება, რომლის თანამედროვე ქართული ენის ვერსია და შესავალი წერილი ლეილა ბერიაშვილის შესრულებულია.

ასეთი გამოცემის მიზანია, ერთი მხრივ, დაეხმაროს სასწავლო პროცესს და მოსწავლეებს გაუადვილოს ტექსტებთან წვდომა, მეორე მხრივ კი, საქართველოს ისტორიით, კულტურითა და ლიტერატურით დაინტერესებულ მრავალ ადამიანს, რომელთაც დღეს ძველი ქართული ნაკლებად ესმით, გაუხსნას გზა ამ უნიკალური წყაროებისკენ.

ჰაგიოგრაფიული თხზულებები ტრადიციულად დიდი შემოკლებებით იბეჭდება ხოლმე, განსაკუთრებით სასწავლო გამოცემებში. ქარჩხაძის გამომცემლობის ქართული ჰაგიოგრაფიის წიგნში აბოს წამების, გრიგოლ ხანძთელის ცხოვრებისა და იოანეს და ექვთიმეს ცხოვრების ტექსტები უმცირესი შემოკლებებითაა წარმოდგენილი, ხოლო შუშანიკის წამება პრაქტიკულად სრული სახითაა.

ქარჩხაძის გამომცემლობის ქართული ჰაგიოგრაფია არის წიგნი, რომელიც ერთნაირად საინტერესო და ძვირფასია, როგორც სკოლის მოსწავლეებისთვის, ისე ერთგული მკითხველებისა თუ უბრალოდ ლიტერატურის მოყვარულებისთვის.