სასწრაფო სამედიცინო დახმარების ცენტრის დირექტორი გიორგი ბუთხუზი 18 ივნისს გადაცემა ბიზნესკურიერში გაჟღერებულ ბრალდებას ეხმაურება.

საქმე ეხება 18 ივნისს, გადაცემა ბიზნესკურიერის ეთერში ერთ-ერთი კლინიკის ხელმძღვანელ ანზორ მელიას განცხადებას, სადაც საუბარია სასწრაფო სამედიცინო დახმარების ცენტრის წარმომადგენლების მხრიდან სხვა კლინიკებთან კორუფციულ გარიგებებსა და ფულის გათეთრების ბრალდებაზე.

ანზორ მელიას განცხადებით, არამიანცის ტერიტორიაზე განლაგებულ კლინიკებს 90%–ით შეუმცირდათ პაციენტთა ნაკადი, რასაც გიორგი ბუთხუზი სიცრუეს უწოდებს.

სამედიცინო ცენტრის დირექტორის თმით, მათ შეამოწმეს ოფიციალური სტატისტიკური მონაცემები, რომლის მიხედვითაც თვალნათლივ ჩანს, რომ ამ კლინიკებში სასწრაფო სამედიცინო დახმარების ბრიგადების მიერ გადაყვანილი პაციენტების რაოდენობამ არათუ იკლო, არამედ მოიმატა.

ბუთხუზის თქმით, ცენტრის იურისტები უკვე ამზადებენ სარჩელს ანზორ მელიას წინააღმდეგ, რომელიც უახლოეს საათებში შევა სასამართლოში.

გიორგი ბუთხუზის თქმით, სატელევიზიო ეთერამდე რამდენიმე დღით ადრე, ანზორ მელია შეხვდა ცენტრის დირექტორს, თავად გაეცნო ამ მონაცემებს და არანაირი პრეტენზია სასწრაფო სამედიცინო დახმარების ცენტრის მიმართ არ გამოუთქვამს.

"ბიზნესკურიერში გასული რეპორტაჟი მთლიანად აგებული იყო ცრუ ბრალდებებზე, რაც პირდაპირ ლახავს სასწრაფო სამედიცინო დახმარების ცენტრში მომუშავე თანამშრომლების, ექიმების ღირსებას, რომლებიც 24 საათიან რეჟიმში მუშაობენ ადამიანების დასახმარებლად და ხშირად, მათი სიცოცხლის გადასარჩენად" - აცხადებს ბუთხუზი.

გიორგი ბუთხუზი ბიზნესკურიერში გასულ განცხადებას ნაციონალურ მოძრაობის წინასაარჩევნო გეგმებთან აკავშირებს და ასევე პარტიას დებს ბრალს სასწრაფო სამედიცინო ცენტრის მიზანმიმართული დისკრედიტაციის მცდელობაში.

სასწრაფო სამედიცინო დახმარების ცენტრი ბიზნესკურიერის გუნდისგან კორუფციული სქემებისა და გარიგებების დამადასტურებელი ფაქტებისა და დოკუმენტების წარმოდგენას სთხოვს, წინააღმდეგ შემთხვევაში, პატივის, ღირსებისა და საქმიანი რეპუტაციის შელახვის გამო ცენტრი სასამართლოში სარჩელის შეტანას გეგმავს.