ოცნების ხელისუფლების დანიშნულმა პრეზიდენტმა, მიხეილ ყაველაშვილმა ჟურნალისტის კითხვაზე — როდის ელოდება ტრამპის ზარს? განაცხადა, რომ "ტრამპთან შეთანხმება არ ჰქონია, რომ მას უნდა დაერეკა მისთვის, დაკავშირება არ ნიშნავს დარეკვას".

"თქვენი და თქვენი პარტნიორი, რადიკალური ფრთის ტელევიზიები, პარტიები და არასამთავრობო ორგანიზაციები, მთელი ამ ხნის განმავლობაში ატყუებდით საზოგადოებას, რომ ეს არის ფეიკ ნიუსი, რომ არ მიიწვია [ტრამპმა] საქართველოს პრეზიდენტი, რომ არ იყო შეხვედრა, არ იყო საუბარი, რომ სურათზე მიახატეს მიხეილ ყაველაშვილი და ასე შემდეგ. ტრამპთან შეთანხმება არ მქონია, რომ მას უნდა დაერეკა ჩემთვის, დაკავშირება არ ნიშნავს დარეკვას, ჩვენ გვქონდა საუბარი, რომ უნდა განახლდეს ჩვენს შორის ურთიერთობები, მან მითხრა, რომ გასაგებია მისთვის და აუცილებლად დაუბრუნდება ამ საკითხს", ­— განაცხადა ყაველაშვილმა.

მისი თქმით, მიხეილ ყაველაშვილი საქართველოს პრეზიდენტი იყო საზეიმო ვახშამზე მიწვეული, ეს არის რეალობა და ფაქტი

"რატომ არ აქვს მნიშვნელობა, ტრამპმა ვინ მიიწვია საზეიმო ვახშამზე ? თქვენ, თქვენი პატრონები, ატყუებთ ახალგაზრდებს, საზოგადოებას, რომ ჩვენ ვარ არალეგიტიმური ხელისუფლება. მიხეილ ყაველაშვილი საქართველოს პრეზიდენტი იყო საზეიმო ვახშამზე მიწვეული, ეს არის რეალობა და ფაქტი, რატომ ატყუებთ საზოგადოებას?", — მიმართა ყაველაშვილმა ჟურნალისტებთან ხმის მიცემის შემდეგ.

ცნობისათვის. 26 სექტემბერს მიხეილ ყაველაშვილმა განაცხადა, რომ ნიუ-იორკში გამართულ ვახშამზე დონალდ ტრამპს შეხვდა და უთხრა, რომ "დროა, ჩვენი ურთიერთობა ახალი ფურცლიდან დაიწყოს". ყაველაშვილის განცხადებით, აშშ-ის პრეზიდენტი დაჰპირდა, რომ ამ თემას დაუბრუნდება და მას დაუკავშირდება.

"საზოგადოებას ალბათ ვახშამი აინტერესებს, რომელიც გამართა ამერიკის შეერთებული შტატების პრეზიდენტმა, სადაც მოხდა ჩვენი შეხვედრა. მას განვუცხადე, რომ დროა, ჩვენი ურთიერთობა ახალი ფურცლიდან დაიწყოს, რაზეც მიპასუხა, რომ მიხედავს ამ საკითხს. დამპირდა, რომ აუცილებლად დაუბრუნდება ამ თემას და დამიკავშირდება. დაველოდოთ მის პასუხს. გვქონდა სხვა არაერთი სხვა შეხვედრაც ადმინისტრაციასთან, ვაჭრობის მდივანთან," — თქვა მიხეილ ყაველაშვილმა.