"ოცნების" პრემიერმა, ირაკლი კობახიძემ უზენაესი სასამართლოს ყოფილი მოსამართლის, ბესარიონ ალავიძის მიერ მოსამართლეების მხილებაზე განაცხადა, რომ ალავიძეს "დიპლომთან ჰქონდა პრობლემა. ამის გამო ვეღარ დაიკავა მოსამართლის თანამდებობა და განაწყენებული საუბრობს ასეთ რაღაცებს".

"ეს არის ადამიანი, რომელსაც დიპლომთან ჰქონდა პრობლემა. ამის გამო ვეღარ დაიკავა მოსამართლის თანამდებობა და განაწყენებული საუბრობს ასეთ რაღაცებს. 3 წლის წინ უკვე გაეცა პასუხის ამ ინტერვიუს, რომელიც ახლა ამოქექეთ არჩევნების წინ. კაცი ტყუილს ამბობს. არავითარი დასტური არ აქვს, სად არის ჩანაწერი? რა ჩანაწერი?

როდესაც საუბარია ხოლმე სასამართლოზე, თუ არ ვცდები ეს ადამიანი მონაწილეობდა "რუსთავი 2"-ის საქმეში, რომელთან დაკავშირებითაც სტრასბურგის სასამართლომ განაცხადა, რომ უზენაესმა სასამართლომ, ისევე როგორც სააპელაციო და პირველი ინსტანციის სასამართლოებმა მიიღეს აბსოლუტურად სამართლიანი გადაწყვეტილება. ეს კაცი ახლა რას ამტკიცებს? თვითონ უნდოდა უსამართლო გადაწყვეტილების მიღება "რუსთავი 2"-ის საქმეზე და ვიღაც აიძულებდა, სამართლიანი გადაწყვეტილების მიღებას. უყურეთ რამხელა აბსურდშია ეს კაცი. არასერიოზული ბრალდებებია", — განაცხადა ოცნების პრემიერმა, ირაკლი კობახიძემ უზენაესი სასამართლოს ყოფილი მოსამართლის, ბესარიონ ალავიძის მიერ მოსამართლეების მხილებაზე.

ჟურნალისტის კითხვაზე, გამოძიება უნდა დაიწყოს თუა რა ბესარიონ ალავიძის განცხადებებთან დაკავშირებით ირაკლი კობახიძემ განაცხადა "ნებისმიერ ტყუილზე გამოძიება ვერ დაიწყება".

"რაზე ამაზე, რომ ვიღაც აიძულებდა სამართლიანი გადაწყვეტილების მიღებას? ნებისმიერ ტყუილზე გამოძიება ვერ დაიწყება", — თქვა კობახიძემ. მისივე თქმით, 65%-იანი რეიტინგი აქვთ და ამას აჩვენებს დღე აჩვენებს.

შეგახსენებთ, რომ ბესარიონ ალავიძემ "ტვ პირველის" გადაცემა "რეაქციაში" განაცხადა, რომ აქვს პირდაპირი მტკიცებულება, "რომელიც ადასტურებს, რომ სასამართლო კლანი ურჩევს მოსამართლეს საქმეს და ასახულია სქემა, როგორ ხდება მოსამართლეების დანიშვნა, წინასწარ გარიგება და ვაჭრობა".

ამას გარდა, 2 ოქტომბერს სოციალურ ქსელში გავრცელდა 2022 წლით დათარიღებული ვიდეოჩანაწერი, სადაც უზენაესი სასამართლოს ყოფილი მოსამართლე ბესარიონ ალავიძე მასზე და სხვა მოსამართლეებზე ზეწოლის ფაქტებზე საუბრობს და ე.წ. სასამართლო კლანსა და მის წევრებს ასახელებს. ჩანაწერში, რომელიც საია-ს ოფისშია ჩაწერილი, ყოფილი მოსამართლე იხსენებს რა ხდებოდა "რუსთავი 2-ის", მეტალურგიული ქარხნის, თბილავიამშენის და სხვა გახმაურებულ საქმეებზე. ჩანაწერის საია-ში ჩაწერა დაადასტურა ახალგაზრდა იურისტთა ასოციაციის მაშინდელმა ხელმძღვანელმა ნიკა სიმონიშვილმა.