"ბიძინა ივანიშვილს არ ეშინია არავითარი სანქციების" — ასე უპასუხა ოცნების პრემიერმა ირაკლი კობახიძემ კითხვას ინფორმაციაზე, რომ კონკრეტული ბიზნესმენები დასავლეთის ლიდერებს სთხოვენ ოცნების საპატიო თავმჯდომარე ბიძინა ივანიშვილი არ დაასანქცირონ.

კობახიძის თქმით, უკრაინაში ომის დაწყების დღიდან, ივანიშვილის მიმართ "არაფორმალური სანქციები" მოქმედებს და თანხებიც გაუყინეს, თუმცა ამით ვერ შეაშინებენ.

ოცნების პრემიერმა აღნიშნა, რომ ქვეყანას ერთადერთი ბიზნესელჩი ჰყავს ქვეყნის შიგნით და ქვეყნის გარეთ და ეს არის ეკონომიკის მინისტრი, რომელიც პარტნიორებს მანდატის ფარგლებში ესაუბრება.

"ჩვენ გვყავს ერთადერთი ბიზნესელჩი ქვეყნის შიგნით და ქვეყნის გარეთ — ეს არის ეკონომიკის მინისტრი. ჩვენს პარტნიორებს, მათ შორის, ქვეყნის გარეთ, სწორედ, ეკონომიკის მინისტრი ესაუბრება ეკონომიკისა და ბიზნესის საკითხებთან დაკავშირებით, ეს პირდაპირ არის მისი მანდატი. ბიზნესმენს შეუძლია თავისი სახელით ესაუბროს ნებისმიერ ადამიანს, თუმცა ეს არ არის ჩვენი მმართველობის სფეროს ნაწილი. რაც შეეხება ხელისუფლებას, ეკონომიკისა და ბიზნესის სფეროებში წარმოადგენს ეკონომიკის მინისტრი. შეიძლება რიგითი ადამიანი საუბრობდეს ვიღაცასთან, ეს მათი საქმეა. რაც შეეხება ხელისუფლებას, ჩვენ წარმოგვადგენს ეკონომიკის მინისტრი ბიზნესთან ურთიერთობაში როგორც ქვეყნის შიგნით, ისე ქვეყნის გარეთ...

ბიძინა ივანიშვილს არ ეშინია არავითარი სანქციების. მის მიმართ, უკრაინაში ომის დაწყების დღიდან, პრაქტიკულად, მოქმედებს არაფორმალური სანქციები, გაუყინეს თანხები. ვერ შეაშინებენ ამ კაცს სანქციებით... არ არის საინტერესო" — თქვა კობახიძემ.