"რა თქმა უნდა, როგორ არ უნდა ვიდარდო [ბიძინა ივანიშვილის დასანქცირებაზე] იმიტომ, რომ კაცია, რომელიც უდგას ამ ქვეყანას სათავეში და მაგრად უდგას", — ამის შესახებ ბიზნესმენმა ნოშრევან ნამორაძემ ჟურნალისტებთან საუბრისას განაცხადა.

მან ოპოზიციური მედიის წარმომადგენლებსაც მიმართა და აღნიშნა, რომ მათ კომენტარს არ მისცემს

"გადავწყვიტე, რომ თქვენ კომენტარი საერთოდ არ მოგცეთ, არც თქვენ ["ტვ პირველს"] და არც "ფორმულას". რაღაც ადამიანობა არ გაქვთ? როგორ შეიძლება ადამიანს ასე გაუმწაროთ ცხოვრება, ასეთ დონეზე?!" — თქვა ნოშრევან ნამორაძემ.

20 სექტემბერს ტელეკომპანია "ფორმულამ" გაავრცელა ინფორმაცია იმის შესახებ, რომ ნოშრევან ნამორაძემ ქვეყანა დატოვა. ჟურნალისტებთან საუბრისას ბიზნესმენმა ამ საკითხთან დაკავშირებითაც გააკეთა კომენტარი და აღნიშნა, რომ ზრდასრული ადამიანია და სადაც სურს, იქ წავა.

"ზრდასრული ადამიანი ვარ. სადაც მინდა იქ წავალ და იქ ვიქნები. 18 წელს გადავცილდი... 18 წელს გადავცილდი-მეთქი, ვარ ზრდასრული? სადაც მინდა, იქ წავალ," — თქვა ბიზნესმენმა.

ჟურნალისტების კითხვები ბიძინა ივანიშვილის სანქცირებას და ამ ნაბიჯის ქართულ ბიზნესზე გავლენასაც ეხებოდა. ამასთან დაკავშირებით ნოშრევან ნამორაძემ თქვა, რომ ბიძინა ივანიშვილი "კაცია, რომელიც უდგას ამ ქვეყანას სათავეში და მაგრად უდგას" და ამიტომ მის დასანქცირებაზე დარდობს.

"თქვენ ნუ დარდობთ, თქვენ იდარდეთ აი, ასეთ მოქმედებებზე, რასაც თქვენ შვრებით. რა თქმა უნდა, როგორ არ უნდა ვიდარდო [ ბიძინა ივანიშვილის დასანქცირებაზე] იმიტომ, რომ კაცია, რომელიც უდგას ამ ქვეყანას სათავეში და მაგრად უდგას. თქვენ რასაც უშვრებით ოჯახებს, ცოტა ხნის წინ, მე რა მიქენით?! მეუბნებით, "გაიქეციო", "იმალება","დატოვა" — ეს ჩემი ნათქვამია?! თქვენ ხართ უსირცხვილოები", — განაცხადა ნამორაძემ.