"სიმართლის ერთგულება გაგვამარჯვებინებს ამ გზაზე. შესაბამისად, რომ მოიგონეს ბანერზე წარწერა კრიმინალიაო, დიახ, უნდა ვანახოთ, რომ მათ მოგონილ უკანონობებს არ ვემორჩილებით. მეორე, რაზეც დგას ჩვენი ბრძოლა არის სოლიდარობა," — ამის შესახებ კოალიცია ცვლილებისთვის ლიდერის, ელენე ხოშტარიას მიერ ზაჰესის იზოლატორიდან გამოქვეყნებულ წერილშია აღნიშნული.

ელენე ხოშტარიას თქმით, სიმართლის, ღირსების და თავისუფლების "სულ ოდნავადაც კი დათმობა, ამ ბოროტმოქმედ სისტემასთან დაუშვებელია".

"სიმართლის, ღირსების და თავისუფლების სულ ოდნავადაც კი დათმობა, ამ ბოროტმოქმედ სისტემასთან დაუშვებელია. არცერთმა სინდისის პატიმარმა იოტისოდენა სიმართლეც კი არ დათმო. გამოკეტეს, მაგრამ მორალურად გაიმარჯვა მზიამაც, ნინო დათაშვილმაც, და ყველამ. ენჯეოებმა არ დათმეს იოტისოდენა თავისუფლება და არ დაემორჩილნენ "რუსულ კანონს". ჩვენ არ დავემორჩილეთ ყალბ არჩევნებს. არ შევედით ყალბ პარლამენტში, არც ყალბ კომისიაში, არც ყალბ 4 ოქტომბრის სპეცოპერაციაში.

სიმართლის ერთგულება გაგვამარჯვებინებს ამ გზაზე. შესაბამისად, რომ მოიგონეს ბანერზე წარწერა კრიმინალიაო, დიახ, უნდა ვანახოთ, რომ მათ მოგონილ უკანონობებს არ ვემორჩილებით.

მეორე, რაზეც დგას ჩვენი ბრძოლა არის სოლიდარობა. ყველა მოქალაქემ, ყველა აქტივისტმა, ყველა მებრძოლმა უნდა იცოდეს, რომ სისტემასთან მარტო არ დავტოვებთ. მოინდომეს მეგის დაჩაგვრა, ვერ მივართმევთ!

ბოლომდე!" — წერს ელენე ხოშტარია.

კოალიცია ცვლილებისთვის ლიდერის, ელენე ხოშტარიას დაკავება შინაგან საქმეთა სამინისტრომ ოფიციალური განცხადებით დაადასტურა. უწყებამ გამოძიება "ნივთის დაზიანების" მუხლით დაიწყო. ოპოზიციონერმა 14 სექტემბერს კალაძის ბანერებზე დააწერა: "რუსული ოცნება", "რუსი". ელენე ხოშტარიას თქმით, ამით მან სოლიდარობა გამოხატა მეგი დიასამიძის მიმართ, რომელიც ამავე ბანერებზე გაკეთებული წარწერის გამო დააკავეს და შემდეგ გირაოთი გაათავისუფლეს.