"ჩვენ გავაკეთებთ ყველაფერს ამ რეჟიმის უსწრაფესად დასრულებისთვის და ვერავითარი დაკავებები ამას ხელს ვერ შეუშლის," — ასე ეხმაურებიან კოალიცია ცვლილებისთვის გუნდში მათი ლიდერის, ელენე ხოშტარიას დაკავებას.

ერთობლივ ბრიფინგზე კოალიცია ცვლილებისთვის წევრმა, გიგა ლემონჯავამ აღნიშნა, რომ მათი კოალიციის ოფისზე ისეთი წარწერებია გაკეთებული, რომელიც არ იშლება, თუმცა შსს-ს ამისთვის არავინ დაუკავებია.

ლემონჯავა ხოშტარიასთვის წარდგენილ ბრალს აბსურდულს უწოდებს.

"რამდენიმე წუთის წინ გამოგონილი, შეთითხნილი, უსამართლო ბრალდებით დააკავეს კოალიცია ცვლილებისთვის ლიდერი ელენე ხოშტარია. ელენე ხოშტარია დააკავეს იმიტომ რომ ის არის მნიშვნელოვანი ადამიანი საერთო სახალხო წინააღმდეგობაში ამ ქვეყნის გარუსების წინააღმდეგ, ბიძინა ივანიშვილის ბოროტი, რუსული, მჩაგვრელი რეჟიმის წინააღმდეგ ბრძოლაში.

ამ სამართლებრივ დეტალებში შესვლა საერთოდ არ ღირს იმდენად აბსურდული და სულელურია ეს ბრალდება, მარკერით წარწერის გაკეთება ბანდიტი კალაძის საარჩევნო ბანერზე. ჩვენს უკან არის ჩვენი ოფისი რომელზეც არის არაერთი წარწერა, ისეთი წარწერები, რომლებიც არ იშლება საერთოდ და ეს არის ჩვენი ცხოვრების ყოველდღიურობა, არასოდეს არცერთი ეს ადამიანი შინაგან საქმეთა სამინისტროს არ დაუკავებია, სამაგიეროდ დღეს დააკავეს ერთ-ერთი გამოჩენილი პოლიტიკური ლიდერი ელენე ხოშტარია.

ბიძინა ივანიშვილმა უნდა იცოდეს, რომ ვინც არ უნდა დააკავოს ჯერ ერთი ჩვენთვის ახალი არ არის პოლიტიკური ლიდერების დაკავება, უკვე კოალიცია ცვლილებისთვის 4-დან 4 ლიდერი ზის ციხეში, ჩვენთვის ეს ახალი არ არის, ბრძოლა არ შეწყდება. დააკავებთ ერთს, ბრძოლის დროშას აიღებს მეორე და დააკავებთ მეორეს ბროლის დროშას აიღებს მესამე. ეს არ არის პარტიული ბრძოლა, ეს არის ქართველი ხალხის საერთო სახალხო ბრძოლა საქართველოს გარუსების წინააღმდეგ. ამ ბრძოლას აქვს ერთადერთი დასასრული, ეს არის ბიძინა ივანიშვილის ჩამოშლა მისი რეჟიმის დამხობა და დასრულება, ქართველი ხალხის გამარჯვება. ამიტომ მათ შეუძლიათ გააკეთონ ის, რაც სურთ, ჩვენ გავაკეთებთ ყველაფერს ამ რეჟიმის უსწრაფესად დასრულებისთვის და ვერავითარი დაკავებები ამას ხელს ვერ შეუშლის," — განაცხადა გიგა ლემონჯავამ.

კოალიცია ცვლილებისთვის ლიდერის, ელენე ხოშტარიას დაკავება შინაგან საქმეთა სამინისტრომ ოფიციალური განცხადებით დაადასტურა. უწყებამ გამოძიება "ნივთის დაზიანების" მუხლით დაიწყო. ოპოზიციონერმა 14 სექტემბერს კალაძის ბანერებზე დააწერა: "რუსული ოცნება", "რუსი". ელენე ხოშტარიას თქმით, ამით მან სოლიდარობა გამოხატა მეგი დიასამიძის მიმართ, რომელიც ამავე ბანერებზე გაკეთებული წარწერის გამო დააკავეს და შემდეგ გირაოთი გაათავისუფლეს.