შინაგან საქმეთა სამინისტრო კოალიცია ცვლილებისთვის ლიდერის, ელენე ხოშტარიას დაკავებას ოფიციალური განცხადებით ადასტურებს. უწყება ამტკიცებს, რომ გამოძიების მასალების მიხედვით ელენე ხოშტარიამ კახა კალაძის საარჩევნო ბანერები დააზიანა.

"შინაგან საქმეთა სამინისტროს თანამშრომლებმა, ნივთის დაზიანების ბრალდებით 1979 წელს დაბადებული ელენე ხოშტარია დააკავეს. გამოძიების მასალების მიხედვით ბრალდებულმა, მიმდინარე წლის 14 სექტემბერს, თბილისში, მელიქიშვილის გამზირზე, პარტია ქართული ოცნება — დემოკრატიული საქართველოს თბილისის მერობის კანდიდატის საარჩევნო ბანერები დააზიანა.

გამოძიება სისხლის სამართლის კოდექსის 187-ე მუხლით მიმდინარეობს, რაც
ნივთის დაზიანებას ან განადგურებას გულისხმობს. დანაშაული 5 წლამდე ვადით თავისუფლების აღკვეთას ითვალისწინებს," — ნათქვამია განცხადებაში.

კოალიცია ცვლილებებისთვის ლიდერი ცოტა ხნის წინ საკუთარ სახლთან დააკავეს. ოპოზიციონერმა კალაძის ბანერებზე დააწერა: "რუსული ოცნება", "რუსი". ელენე ხოშტარიას თქმით, ამით მან სოლიდარობა გამოხატა მეგი დიასამიძის მიმართ, რომელიც ამავე ბანერებზე გაკეთებული წარწერის გამო დააკავეს და შემდეგ გირაოთი გაათავისუფლეს.