"ეს არის კიდევ ერთი უტიფარი მაგალითი ორმაგი სტანდარტის ამ არალეგიტიმური, ანტიკონსტიტუციური რეჟიმის მხრიდან," — ასე ეხმაურება პარტია ფედერალისტების ერთ-ერთი ლიდერი გიგა ბოკერია კოალიცია ცვლილებისთვის ლიდერის, ელენე ხოშტარიას დაკავებას.

მისი თქმით, აქტივისტ მეგი დიასამიძის მსგავსად სისხლის სამართლებრივი დევნის დაწყება ელენე ხოშტარიას მიმართაც პოლიტიკური მოტივით ხდება.

"წლების განმავლობაში ივანიშვილის რეჟიმი პირდაპირ თუ ირიბად აორგანიზებდა არაუბრალოდ სიმბოლურ პროტესტსა და დაზიანებას ოპონენტების ბანერების თუ ოფისების გარე სახის, არამედ ძალადობრივ თავდასხმებს და ამისთვის არავინ არ ისჯებოდა, უამრავი მასალაა ამის თაობაზე. ჰა-ჰა, ადმინისტრაციულად დაესაჯათ ვინმე და ეს იყო სტანდარტი.

მეგი დიასამიძის შემთხვევით, ეს ყველაფერი, რახან მათ წინააღმდეგ არის მიმართული, აიყვანეს სისხლის სამართლებრივ დევნაში და ახლა ელენე ხოშტარიაზეც იგივეს აკეთებენ. ეს არის კიდევ ერთი უტიფარი მაგალითი ორმაგი სტანდარტის ამ არალეგიტიმური, ანტიკონსტიტუციური რეჟიმის მხრიდან," — განაცხადა გიგა ბოკერიამ TV პირველთან.

კოალიცია ცვლილებისთვის ლიდერის, ელენე ხოშტარიას დაკავება შინაგან საქმეთა სამინისტრომ ოფიციალური განცხადებით დაადასტურა. უწყებამ გამოძიება "ნივთის დაზიანების" მუხლით დაიწყო. ოპოზიციონერმა 14 სექტემბერს კალაძის ბანერებზე დააწერა: "რუსული ოცნება", "რუსი". ელენე ხოშტარიას თქმით, ამით მან სოლიდარობა გამოხატა მეგი დიასამიძის მიმართ, რომელიც ამავე ბანერებზე გაკეთებული წარწერის გამო დააკავეს და შემდეგ გირაოთი გაათავისუფლეს.