აშშ-ს პრეზიდენტის, დონალდ ტრამპის სპეციალურმა წარმომადგენელმა, კიტ კელოგმა იალტის უსაფრთხოების ფორუმზე განაცხადა, რომ "რუსეთი უკრაინასთან ომს აგებს". კელოგმა განმარტა, რომ დონბასისა და დონეცკის რეგიონში "წინსვლის" მიუხედავად, რუსეთის დანაკარგი დიდია.

"თუ პუტინს ჰგონია, რომ რუსეთი გამარჯვებას აღწევს, მისი "გამარჯვების" განმარტება და ჩემი განმარტება ორი აბსოლუტურად განსხვავებული რამეა. რომ იმარჯვებდეს, ის კიევში იქნებოდა. რომ იმარჯვებდეს, დნეპრის დასავლეთით იქნებოდა. რომ იმარჯვებდეს, ოდესაში იქნებოდა. რომ იმარჯვებდეს, უკრაინის ხელისუფლება უკვე შეცვლილი ექნებოდა. სინამდვილეში რუსეთი ამ ომს აგებს.

ახლა, შეიძლება თქვან, რომ: "დონბასისა და დონეცკის რეგიონში წინ მიდიან", მაგრამ თუ "წინსვლას" მეტრებით ზომავ და არა მილებით, მაშინ კი, შეიძლება წარმატებად ჩათვალო. მაგრამ ის ფასი, რასაც ისინი ამ წინსვლაში იხდიან, უზარმაზარია.

არ მგონია ხალხს რეალურად ესმოდეს ეს რიცხვები, მაგრამ როდესაც დაღუპულებსა და დაჭრილებზეა საუბარი, მათ მილიონზე ბევრად მეტი დაკარგეს. [რუსებმა] ავღანეთი 18 000 ადამიანის დაკარგვის შემდეგ დატოვეს. ვიეტნამი ჩვენ 65 000-ის დაკარგვის შემდეგ დავტოვეთ. რუსეთს კი მილიონზე მეტი დაღუპული ან დაჭრილი ჰყავს. ეს ციფრები მეორე მსოფლიო ომის მასშტაბისაა. თუ დაფიქრდები, თავზარდამცემია," — განაცხადა კელოგმა ("ტაბულას" თარგმანი)

კელოგმა შემდეგ დასძინა, რომ "თუ ჩინეთი დღესვე შეწყვეტს რუსეთის დახმარებას — ომი ხვალ დასრულდებოდა". ცნობისთვის, ტრამპის NATO-ს წევრი ქვეყნებისთვის მიწერილ წერილშიც, აშშ-ის პრეზიდენტი ჩინეთზე 50%-100% ტარიფების დაწესებას მოითხოვს, რადგან ამით რუსეთის მნიშვნელოვანი მოკავშირე დაასუსტონ.