დონალდ ტრამპი Truth Social-ზე წერილს ავრცელებს, რომელშიც NATO-ს წევრ ქვეყნებს მიმართავს. აშშ-ის პრეზიდენტის განცხადებით, ამერიკა მას შემდეგ დაუწესებს რუსეთს მკაცრ სანქციებს, როდესაც NATO-ს წევრი ქვეყნებიც გაიმეორებენ ამ გადაწყვეტილებას და რუსული ნავთობის ყიდვას შეწყვეტენ.

"მე მზად ვარ რუსეთის წინააღმდეგ მნიშვნელოვანი სანქციების დაწესებისთვის მაშინ, როცა NATO-ს ყველა ქვეყანა დაეთანხმება და დაიწყებს იგივე საქმის კეთებას და როცაNATO-ს ყველა ქვეყანა შეწყვეტს რუსეთის ნავთობის ყიდვას. როგორც იცით, NATO-ს ერთგულება გამარჯვების მიმართ ბევრად ნაკლებია, ვიდრე 100%, და ზოგიერთი ქვეყნის მიერ რუსეთის ნავთობის შეძენა შოკისმომგვრელია!" — წერს ტრამპი.

ტრამპი განცხადებაში NATO-ს წევრ ქვეყნებს მოუწოდებს, რომ ჩინეთს 50%-დან 100%-მდე ტარიფები დაუწესონ, რადგან ის რუსეთის მჭიდრო მოკავშირეა და მხოლოდ ამით შეძლებენ რუსეთზე ზეგავლენის მოპოვებას.

"ეს ძლიერ ასუსტებს თქვენს მოლაპარაკების პოზიციას და ვაჭრობის ძალას რუსეთის მიმართ. მე მზად ვარ "გადასასვლელად" მაშინ, როცა თქვენ იქნებით მზად. უბრალოდ თქვით როდის? მე მჯერა, რომ ამას თან თუ დაემატება NATO-ს ჯგუფის მიერ ჩინეთზე 50%-დან 100%-მდე ტარიფების დაწესება, რომლებიც სრულად მოიხსნება რუსეთისა და უკრაინის ომის დასრულების შემდეგ, ეს ასევე დიდ დახმარებას გაუწევს ამ სასიკვდილო ომის დასრულებას.
ჩინეთს ძლიერი კონტროლი და მხარდაჭერა აქვს რუსეთზე, და ეს ძლიერი ტარიფები, კი ამ მხარდაჭერას გაწყვეტს. ეს არ არის ტრამპის ომი (ის არასოდეს დაიწყებოდა, მე რომ პრეზიდენტი ვყოფილიყავი!), ეს არის ბაიდენის და ზელენსკის ომი. მე აქ მხოლოდ იმისთვის ვარ, რომ დავეხმარო მის შეჩერებას და გადავარჩინო ათასობით რუსისა და უკრაინელის სიცოცხლე (მხოლოდ გასულ კვირას 7,118 სიცოცხლე დაიკარგა. სიგიჟეა!). თუ NATO გააკეთებს იმას, რასაც ვამბობ, ომი სწრაფად დასრულდება და სიცოცხლეს გადავარჩენთ! თუ არა — უბრალოდ დროს, ენერგიასა და ამერიკის შეერთებული შტატების ფულს მაკარგვინებთ. მადლობა, რომ ყურადღება მიაქციეთ ამ საკითხს!" — წერს დონალდ ტრამპი Truth Social-ზე.