საზოგადოებრივი პლატფორმა "საქართველოს ევროპული ორბიტის" აღმასრულებელი დირექტორი, ნინო ლომჯარია 9 სექტემბერს, კახა კალაძის საარჩევნო შტაბთან ბანერის დაზიანებისთვის 23 წლის მეგი დიასამიძის სისხლის სამართლის წესით დაკავებას სოციალურ ქსელში ეხმაურება. მისი თქმით კალაძის ბანერი სააგიტაციო მასალაა და მისი დაზიანება უნდა ისჯებოდეს საარჩევნო კოდექსით და არა სისხლის სამართლის კოდექსით. მისივე თქმით, ბანერის დაზიანებისთვის 1000 ლარიანი ჯარიმაა გათვალისწინებული.

"წინასაარჩევნო პერიოდში კანდიდატის პლაკატის დაზიანების საკითხზე პასუხისმგებლობას არეგულირებს საარჩევნო კოდექსი (არა სისხლის კოდექსი) და მისთვის გათვალისწინებულია 1000 ლარიანი ჯარიმა.

იხილეთ საარჩევნო კოდექსის შესაბამისი მუხლები:

1. კალაძის პლაკატი სააგიტაციო მასალაა — "სააგიტაციო მასალა — პლაკატი, დროშა და ნებისმიერი სხვა მასალა, რომლებზედაც გამოსახულია საარჩევნო სუბიექტი/საარჩევნო სუბიექტობის კანდიდატი ან/და მისი არჩევნებში მონაწილეობის რიგითი ნომერი" (მუხლი 2. "ჰ" 7 ქვეპუნქტი);

2. სააგიტაციო მასალის დაზიანება ისჯება "საარჩევნო კოდექსით და არა სისხლის კოდექსით "დაუშვებელია და ამ კანონით დადგენილი წესით ისჯება სააგიტაციო მასალის ჩამოხსნა, ჩამოხევა, დაფარვა ან დაზიანება" (მუხლი 46. პუნქტი 7.1);

3. საარჩევნო პლაკატის დაზიანება ისჯება კოდექსის 80-ე მუხლით — "უკანონოდ ჩამოხსნილი, ჩამოხეული, დაფარული ან დაზიანებული საარჩევნო პლაკატების ამ კანონის მე-80 მუხლით გათვალისწინებული ადმინისტრაციული სამართალდარღვევის ნაწილში ადმინისტრაციული სამართალდარღვევის შესახებ ოქმს ადგენს შესაბამისი მუნიციპალიტეტის აღმასრულებელი ორგანო ან მის მიერ უფლებამოსილი პირი." (მუხლი 93, პუნქტი 4);

4. კოდექსის 80-ე მუხლი ითვალისწინებს 1000 ლარიან ჯარიმას", — წერია ნინო ლომჯარიას მიერ გავრცელებულ განცხადებაში.

ცნობისთვის, 23 წლის მეგი დიასამიძე კახა კალაძის ბანერზე გაკეთებული წარწერისთვის — "რუსული რეჟიმი" დააკავეს. მის წინააღმდეგ საქმე სისხლის სამართლის კოდექსის 187-ე მუხლითაა აღძრული, რაც სხვისი ნივთის დაზიანებას ან განადგურებას გულისხმობს. ეს მუხლი ჯარიმას, საზოგადოებისთვის სასარგებლო შრომას, შინაპატიმრობას 6 თვიდან 2 წლამდე, ან 1-დან 5 წლამდე პატიმრობას ითვალისწინებს.