10 სექტემბერს დაკავებული აქტივისტის, მეგი დიასამიძის ადვოკატი შოთა თუთბერიძე "ნეტგაზეთთან" საუბრისას ამბობს, რომ მისი დაცვის ქვეშ მყოფს პოლიცია "ლანჩხუთის მიმდებარე ტერიტორიაზე ჩაუსაფრდა", როცა მეგი დიასამიძე სახლში, აჭარაში მიდიოდა, შემდეგ ტელეფონი წაართვეს და ხელები ზურგს უკან ბორკილებით შეუკრეს და "9 საათის განმავლობაში მას არ ჰქონდა საშუალება, რომ ადვოკატის მომსახურებით ესარგებლა".

"გაკვირვებას იწვევს ის მასშტაბი და ის რესურსი, რომელიც დაიხარჯა სტუდენტი გოგონას დასაკავებლად, როცა ჩატარდა ძალიან სასაცილო, პრიმიტიული სპეცოპერაცია.

იგი მიდიოდა საკუთარ სახლში, მიემგზავრებოდა აჭარაში, რა დროსაც თითქოს მიკროავტობუსი გაფუჭდა, გადასვეს სხვა მიკროავტობუსში, შემდეგ ამ მიკროავტობუსმა გააჩერა და ჩაუსაფრდნენ სადღაც ლანჩხუთის მიმდებარე ტერიტორიაზე, გურიაში, ტყეში. ჯერ მივიდნენ მძღოლთან და ეჩხუბებოდნენ პოლიციელები არარსებულ სამართალდარღვევაზე, თითქოს მძღოლმა რაღაც საგზაო მოძრაობის წესი დაარღვია, ხოლო ბრძანების მიღების შემდეგ მივიდნენ მეგისთან და პირველი, რაც გააკეთეს, წაართვეს ტელეფონი. ამის შემდეგ 9 საათის განმავლობაში მას არ ჰქონდა საშუალება, რომ ადვოკატის მომსახურებით ესარგებლა.

ბუნებრივია, ეს უკავშირდება მეგის მონაწილეობას აქციებში იმიტომ, რომ საუბრის თემა პოლიციელებთან მუდმივად იყო ეს, რომ დადიოდა თუ არა აქციებზე და თუ დადიოდა, რატომ დადიოდა.

მთელი პერიოდის განმავლობაში მას ჰქონდა ხელები შეკრული ზურგს უკან, მიუხედავად იმისა, რომ ითხოვა ბორკილების ან მოშვება ან ხელების წინ გადმოტანა ძალიან ცინიკურად უთხრეს, რომ ნაკლები ემოძრავა და ხელები აღარ ეტკინებოდა. ცდილობდნენ მის დამუშავებას, გაუგებარ ფაქტებზე საუბარს და ინფორმაციის გამოძალვას, თუმცა არცერთ მომენტში მისთვის არ განუმარტავთ, თუ რატომ არის ის დაკავებული და ჩვენც, მისი ადვოკატებიც ამჟამად ვართ ბუნდოვანებაში და არ ვიცით, რეალურად რის გამოა დაკავებული, რას ედავება მას გამოძიება.

პოლიციელების ქცევას არ შეიძლება მიეცეს სამართლებრივი შეფასება, გარდა იმისა, რომ ეს არის დანაშაული, უფლებამოსილების ბოროტად გამოყენება, რაც მათ გააკეთეს. სულ რომ დამნაშავე იყოს მეგი დიასამიძე, ნებისმიერ ბრალში, ის, რაც მას, როგორც დაკავებულს გაუკეთეს არის სისხლის სამართლის დანაშაული და მე დარწმუნებული ვარ, ისინი პასუხს აგებენ ამ თვალსაზრისით აუცილებლად", — განაცხადა თუთბერიძემ.

23 წლის მეგი დიასამიძე 9 სექტემბერს კახა კალაძის ბანერზე გაკეთებული წარწერისთვის — "რუსული რეჟიმი" დააკავეს. მის წინააღმდეგ საქმე სსკ-ის 187-ე მუხლითაა აღძრული, რაც სხვისი ნივთის დაზიანებას ან განადგურებას გულისხმობს. ეს მუხლი ჯარიმას, საზოგადოებისთვის სასარგებლო შრომას, შინაპატიმრობას 6 თვიდან 2 წლამდე, ან 1-დან 5 წლამდე პატიმრობას ითვალისწინებს.

მეგი დიასამიძის დაკავების შესახებ ინფორმაცია თავდაპირველად მისმა დამ, ნელი დიასამიძემ სოციალურ ქსელში გაავრცელა. მან დაწერა, რომ "რეჟიმი ამ მეთოდებით აქტივისტების დაშინებას ცდილობს".

"დაკავებულია ჩემი და და თანამებრძოლი მეგი დიასამიძე.

რეჟიმი ცდილობს, ამ მეთოდებით შეგვაშინოს, რის გამოც კიდევ უფრო მეტად უნდა ვიბრძოლოთ, რომ მეგიც და ყველა პოლიტიკური ტყვე თავისუფალი იყოს წლის ბოლომდე!

დამხობა რეჟიმს!", — დაწერა სოციალურ ქსელში ნელი დიასამიძე.